მზადდება ხუთი ცვლილების წესი

დიდი შანსია, როდესაც პრემიერლიგის შეწყვეტილი სეზონი განახლდება, გუნდებს თამაშში ხუთი ფეხბურთელის შეცვლის ნება დართონ.

რატომ მოუვიდათ ასეთი რამ თავში აზრად? იმიტომ, რომ თუკი ჩემპიონატი განახლდება, ფეხბურთელებს ხუთ ან ნაკლებ კვირაში ცხრა ტურის ჩატარება მოუწევთ, რაც მათი ჯანმრთელობისთვის სახიფათოა.

ამ საკითხზე პრემიერლიგის მწვრთნელები და ექიმები კარგა ხანია ფიქრობდნენ. ისინი განიხილავდნენ ფეხბურთელების დაცვის სხვადასხვა ვარიანტს. ხუთი შეცვლა კი ფიფას იდეაა. ცხადია, ლაპარაკია დროებით ზომაზე.

ახლა, მსოფლიო ფეხბურთის ბოსების წინადადებას ფეხბურთის წესებზე პასუხისმგებელი ოთხი ბრიტანული ფედერაცია განიხილავს. მათ შორის სეფე სიტყვა, რასაკვირველია ინგლისს ეკუთვნის, ინგლისის ფეხბურთის ასოციაცია კი ვის დაეკითხება თუ არა პრემიერლიგას.

დაზუსტება: შეთავაზებულ ვარიანტში გათვალისწინებულია, რომ დროებითი წესის თანახმად ერთ შეხვედრაში ორმა გუნდმა შეიძლება ჯამში ათი შეცვლა განახორციელოს, რაც თამაშის დინამიკას გააფუჭებს. ამიტომ, განიხილავენ შეცვლებისთვის გამოყოფილი სამი ფანჯრის ვარიანტს — გუნდებმა ფეხბურთელები შეიძლება შეცვალონ, მაგალითად შესვენებისას ან თამაშის დროს სხვა მიზეზით წარმოქმნილი შეჩერების განმავლობაში.

ამბობენ, რომ თუ ახალი (დროებითი) წესი შემოიღეს, ის ყველა ქვეყნისთვის სავალდებულო არ იქნება.

შეგახსენებთ, რომ უეფამ ეროვნული ჩემპიონატების დასრულების ვადად 2 აგვისტო დათქვა, რადგან 7-19 აგვისტოს ჩემპიონთა და ევროპალიგების ჩატარება სურს.

დაგვეთანხმებით, შინ ნაჯდომი ფეხბურთელები უცბად, მართლა ძალიან დიდი დატვირთვის წინაშე დადგებიან.