ორი ნაბიჯი ფედერერამდე

ნიკოლოზ ბასილაშვილმა პარიზის მასტერსი გამარჯვებით დაიწყო. პირველ წრეში მისი მეტოქე ავსტრალიელი ჯონ მილმანი გახლდათ, რომელიც მსოფლიო რეიტინგში 35-ე ადგილს იკავებს. პირველ სეტში ნიკამ ერთი მოწოდება აართვა მეტოქეს და მშვიდად მივიდა 6:4-მდე. მეორე სეტი არ შედგა – მილმანმა ტრავმა მოიმიზეზა და კორტზე აღარ გავიდა.

მეორე წრეში ბასილაშვილის მეტოქე სამხრეთაფრიკელი კევინ ანდერსონი იქნება. 32 წლის ვეტერანი რეიტინგის მე-8 ნომერია, პარიზში კი მე-7 ნომრად არის განთესილი.

სამხრეთაფრიკელმა ოქტომბერში უკვე დაგვიმარცხა ნიკა და იმედია, ამჯერად რევანში შედგება. ამ წყვილის გამარჯვებული, სავარაუდოდ კეი ნიშიკორის შეხვდება, მერე კი… მერე ფედერერი იქნება.

მძიმე ბადეა? რა თქმა უნდა – პარიზის მასტერსი ხომ სტატუსით მხოლოდ დიდი სლემის ტურნირებს ჩამოუვარდება და ATP-1000 კატეგორიისაა.

ნიკას მონაგარმა მეორე წრეში გასვლისთვის 45 სარეიტინგო ქულა და 33 ათას ევროზე ცოტა მეტი შეადგინა.

ავტორის პროფილი

გიორგი ნოზაძე: მას შეეძლო, დილის 11 საათისთვის გაზეთის ორი გვერდი მზად ჰქონოდა და გადაერეკა თანამშრომლებისთვის - ნუ შეწუხდებით, სამსახურში ნუღარ მოხვალთ, საქმე გაკეთებულია. ფეისბუკის ნამდვილი ფეისი. ის გახლავთ სოციალურ ქსელში "მოამბეც" და "ვრემიაც".