ემპოლი და საბა ინტერთან ვერას გახდნენ

„ინტერმა’’ საბა გოგლიჩიძის „ემპოლის’’ 3:1 მოუგო და ლიდერ „ნაპოლისთან’’ ჩამორჩენა 3 ქულამდე შეამცირა. მილანელებს „აძურიზე’’ ერთი თამაშით ნაკლები აქვთ ჩატარებული. „შავ-ლურჯებს’’ სერია A-ში ახლა ზედიზედ 15 თამაში არ წაუგიათ. რაც შეეხება „ემპოლის’’, ის 21 ტურის შემდეგ 20 ქულით მე-14 ადგილზეა, მაგრამ გასავარდნთა ზონას ანუ მე-18 ადგილს მხოლოდ ერთი ქულით აღემატება.

გოგლიჩიძე თამაშში 66-ე წუთზე ჩაერთო, როდესაც მასპინძლებმა მნიშვნელოვნად მოუმატეს ინტენსივობას. იმ ორ გოლში, რომლებიც „ემპოლის’’ კარში დარჩენილ დროში გავიდა, ქართველ მცველს ბრალი არ მიუძღვის. მისი თამაში სხვადასხვა საიტებმა ასე შეაფასეს:

calciomercato — 5.0. მისი შესვლის შემდეგ „ინტერმა’’ რბევა მოაწყო..

pianetaempoli — 5.5 მისმა მოედანზე შესვლამ „ემპოლის’’ დაცვას ის სოლიდურობა ვერ შემატა, რომლისაც გუნდს მატჩის მიწურულს ეიმედებოდა.

Tuttomercatoweb ― 5.5 (სიტყვასიტყვთ იგივე დაწერა, რაც pianetaempoli-მ)

eurosport — 5.5 ის „ინტერის’’ გააქტიურებას წინ ვერ აღუდგა.

Flashscore-მა საბა გოგლიჩიძეს 6.0 დაუწერა, ხოლო whoscored-მა ქართველის თამაში 6.1 ქულით შეაფასა.