პორტუგალიელი მეშვიდე ნომერი

Manchester United were involved in a physical clash with Atletico Madrid on Saturday ოსლოში, „მანჩესტერ იუნაიტედისა” და „ატლეტიკოს” შეხვედრაში გადამწყვეტი სიტყვა მეშვიდე ნომრით მოთამაშე პორტუგალიელმა თქვა, ოღონდ ეს ის პორტუგალიელი არ იყო თქვენ რომ იფიქრეთ. ეს გახლდათ მადრიდელი ჟოაო ფელიქსი, რომელმაც კრიშტიანუ რონალდუს გუნდს ამხანაგური თამაშის მეორე ტაიმში გოლი გაუტანა და სეზონისწინა პერიოდის პირველი მარცხი აწვნევინა — 1:0. რაც შეეხება რონალდუს, ის მთელი ზაფხული ცდილობდა სხვაგან გადასვლას, „ოჯახური მიზეზების” გამო გუნდთან ერთად არ ვარჯიშობდა, მაგრამ, როგორც მწვრთნელი ერიკ ტენ ჰაგი ამბობს, საბოლოოდ დაბრუნდა და შემდეგ ამხანაგურში „რაიო ვალეკანოსთან” მოედანზეც იქნება. დანარჩენს მომავალი გვიჩვენებს.

რონალდუს არყოფნაში კი მთავარი მოქმედი პირები კრისტიან ერიკსენი და ლისანდრო მარტინესი გახდნენ. მანჩესტერელ ახალწვეულთა წყვილი ახალ გუნდში პირველ გამოჩენას ელოდა, რადგან აქამდე ტენ ჰაგს მიაჩნდა, რომ ისინი ფიზიკურად არ იყვნენ მზად.

ინგლისურ გუნდში წესით ჯეიდონ სანჩოს უნდა ეთამაშა, მაგრამ ნორვეგიაში ჩაფრენის შემდეგ მან თავი ცუდად იგრძნო და მწვრთნელმა შვედი ანტონი ელანგათი შეცვალა.

მანკუნიანელებმა სწრაფად დაიწყეს. აქტიურობდნენ მარკუს რეშფორდი და ანტონი მარსიალი, რომლებიც ამ ზაფხულში კარგ შთაბეჭდილებას ტოვებენ. პირველს „ატლეტიკოს” მეკარემ იან ობლაკმა აუღო, მეორემ ხელსაყრელი მომენტი ხარიხას გადააცილა. უნდა ითქვას, რომ „მატრასების მკერავთა” შორის სლოვენიელი მეკარე გამოირჩეოდა.

პირველ ტაიმში ნანახით მადრიდელთა მწვრთნელი დიეგო სიმეონე უკმაყოფილო დარჩა. სავარაუდოდ ამით იყო განპირობებული ცხრა(!) ცვლილება, რომელიც მან მე-60 წუთზე განახორციელა. მოედანზე შევიდნენ ვარსკვლავები ალვარო მორატა, ანტუან გრიზმანი და ზემოთ ნახსენები ჟოაო ფელიქსი.

70-ე წუთზე ტენ ჰაგმა მოედანზე ერიკსენი შეუშვა, რასაც სტადიონზე დიდი ოვაცია მოყვა. ერიკსენი რამდენჯერაც კი შეეხო ბურთს, იმდენჯერ ტაში მოსწყვიტა ტრიბუნებს. მისი დაბალი პასებით ელანგას და რეშფორდს გოლის გატანამდე ცოტა დააკლდათ. „ატლეტიკოს” კარში ბურთის შეგდება შეეძლო 20 წლის ურუგვაელ ფაკუნდო პელისტრისაც, მაგრამ სავარაუდოდ აღელდა და მისკენ გადმოვარდნილი ასხლეტილი ბურთი კარში ვერ შეაგდო.

შემდეგ, ჟოაო ფელიქსმა შეხვედრის ერთადერთი გოლი გაიტანა, ფრედმა კი მორატას დააბიჯა და მეორე ყვითელი ანუ წითელი ბარათი მიიღო.

https://www.youtube.com/watch?v=G3xPIdUPEk4