ახლა კი უკვე ვეღარავინ იტყვის, ვინ გახდება ლა ლიგის ჩემპიონი. გუშინ „ბარსელონამ” სტუმრად მოუგო „ვილიარეალს” 2:1, ხოლო ლიდერმა „ატლეტიკომ” ბილბაოში ასეთივე ანგარიშით წააგო. გამოდის, რომ „ატლეტიკოს” 33 თამაშიდან 73 ქულა აქვს, „რეალს” იმდენივე თამაშიდან – 71, ხოლო „ბარსას” ქულები „რეალის” ტოლად აქვს, თამაშების რაოდენობა კი ერთით ნაკლები.
შეგახსენებთ, რომ „ბარსელონა” და „ატლეტიკო” 8 მაისს ერთმანეთს „კამპ ნოუზე” ხვდებიან.
კატალონიური პრესა წერს, რომ ახლა ყველაფერი „ბლაუგრანას” ხელშია — თუ დარჩენილ თამაშებს მოიგებს, ჩემპიონი გახდება. ის კი არა, „ატლეტიკოსთან” ფრის უფლებაც აქვს.
თავის მხრივ, თუ ყველას მოიგებენ, ჩემპიონები „მატრასის მკერავები” გახდებიან. აი, „რეალი” კი კონკურენტების შედეგებზეა დამოკიდებული.
დიეგო სიმეონეს გუნდმა ბასკეთში უხეიროდ ითამაშა. ანგარიში მე-8 წუთზე გაიხსნა, როდესაც სტუმრებს ალეხანდრო ბერენგერმა თავურით გაუტანა. მადრიდელებმა 77-ე წუთზე კუთხურიდან გაათანაბრეს — სტეფან სავიჩმა ესპანეთის ნაკრების თბილისში ნათამაშევი მეკარის უნაი სიმონის პოზიციური შეცდომით ისარგებლა და თავითვე აღადგინა წინასწორობა, მაგრამ ეს მატჩის ბოლო თავური გოლი არ გამოდგა. ინიგო მარტინესმაც კუთხურიდან ჩაწოდებულს დასცხო და ლიდერს 3 ქულა დააკარგინა.
„იმედი არ უნდა გავიტეხოთ. ყოველდღე დაუღალავად უნდა ვითამაშოთ. ჩვენ, მეტოქის პირველმა გოლმა არ გაგვტეხა, გავათანაბრეთ და მეორეს გასატანადაც ვიწევდით, მაგრამ ამ დროს ისევ მასპინძლებმა იყოჩაღეს. მოგება გვინდოდა, თუმცა, რას იზამ. ეს ფეხბურთია. ბრძოლას ბოლომდე გავაგრძელებთ. გვჯერა, რომ ჩემპიონობა შეგვიძლია,” — თქვა მატჩის დამთავრების შემდეგ „ატლეტიკოს” ნახევარმცველმა კოკემ.
