ნიკოლა, მოსისხლე მტრის ბანაკიდან…

„ბარსელონა“ აღარ ხუმრობს. კატალონიელებმა საკალათბურთო გუნდში კორი ჰიგინსი ხომ მიიყვანეს, პოუ გასოლის დაბრუნებაზეც სერიოზულად დაფიქრდნენ და აგერ, NBA-ს ვარსკვლავი ნიკოლა მიროტიჩიც გადაიბირეს.

მიროტიჩის ევროპაში დაბრუნება „ბლაუგრანას“ ოფიციალურმა ვებ-გვერდმა გვამცნო. ესპანეთის ნაკრების მძიმე ფორვარდმა ერთ დროს მოსისხლე მტერთან სამწლიანი კონტრაქტი გააფორმა – 2008-2014 წლებში მიროტიჩი ხომ მადრიდის „რეალის“ ღირსებას იცავდა.

„სამეფო კლუბში“ თამაშისას ნიკოლამ ესპანეთის ჩემპიონობა ორჯერ, თასისა და სუპერთასის მოგება იზეიმა. მიღებული აქვს ლიგა ენდესას MVP-სა და ევროლიგის ამომავალი ვარსკვლავის ჯილდოები.

NBA-ში მიროტიჩმა ფეხი ვერ მოიკიდა, სეზონი „ნიუ ორლეანსში“ დაიწყო და „მილოუკიში“ დაამთავრა. რეგულარულ გათამაშებაში ის საშუალოდ 12.3 ქულას და 5.9 მოხსნას აგროვებდა.

„ბარსა“ კალათბურთელს 8 ივლისს წარადგენს, მანამდე კი ეგებ მიროტიჩის ყოფილი თანაგუნდელის პოუ გასოლის დაბრუნებაც გააოფიციალუროს.

ავტორის პროფილი

ლუკა თალაკვაძე: ლუკა თალაკვაძე ნამდვილი სარბიელელია. ყველას შემწე, გვერდში მდგომი, ალალი და უსაყვედურო. ჟურნალისტის პროფესიის ქიციც იცის და ქიცმაცურიც.