კვერნაძე ითამაშებს, კვარაცხელია დაისვენებს

Giorgi Kvernadze of Frosinone Calcio looks on during the Coppa Italia match between Frosinone Calcio and Pisa Sporting Club at Stadio Benito Stirpe... „ნაპოლის” კალენდარი გადატვირთულია. გუნდმა სერია A-ს ბოლო ტურში „მარადონაზე” 2:1 დაამარცხა „კალიარი”, — გაიმარჯვა შინ, რაც მთელი ორი თვე ვერ მოეხერხებინა — მაგრამ სიხარულის დრო არ აქვს, დღეს იტალიის თასის მერვედფინალში „ფროზინონეს” ხვდება.

„ფროზინონეში” გიორგი კვერნაძე თამაშობს. ის დიდი ალბათობით სასტარტო შემადგენლობაში იქნება. როგორც კლუბის ოფიციალური ვებ-გვერდი წერს, ეუსებიო დი ფრანჩესკო იტალიის ჩემპიონის წინააღმდეგ გადახალისებულ შემადგენლობას გაიყვანს. განლაგება იქნება 3-4-3. ძირითადი შემადგენლობის ხუთი ფეხბურთელი დაისვენებს. მათ ნაცვლად სათადარიგოები ითამაშებენ. საიტის ინფორმაციით კვერნაძე მოედანზე პირველივე წუთიდან იქნება.

სამწუხაროდ, ქართული დერბი მოსალოდნელი არ არის, რადგან შემადგენლობის გადახალისებას აპირებს ვალტერ მაცარიც. „ნაპოლის” რასაკვირველია უნდა, რომ ჩემპიონთა ლიგისა და სერია A-ს შეხვედრებში გამარჯვების შემდეგ იტალიის თასზეც მოიგოს, მაგრამ რამდენიმე დღეში ჟოზე მოურინიუს „რომასთან” ელის შეხვედრა, რის გამოც რამდენიმე ფეხბურთელს, მათ შორის ხვიჩა კვარაცხელიას დაასვენებს. „აძური” მოედანზე სავარაუდოდ ასეთი შემადგენლობით გავა: გოლინი; ძანოლი, ოსტიგორი, ნატანი, მარიო რუი; კაიუსტე, დემე, გაეტანო; ლინდსტრომი, სიმეონე, რასპადორი.