პროფესორმა შოთა ინგოროყვამ ოპერაცია წარმატებით ჩაატარა

ბულგარეთის საფეხბურთო კავშირმა განაცხადა, რომ სასწრაფო ოპერაციამ, რომელიც ქვეყნის ეროვნული ნაკრების წევრს ტოდორ ნედელევს თბილისში ჩაუტარდა, წარმატებით ჩაიარა.

ნახევარმცველს თავის ქალის დაზიანება ჰქონდა, რომელიც გადაუდებელ ოპერაციას მოითხოვდა. ოპერაცია ჩაატარა ნეიროქირურგმა, პროფესორმა შოთა ინგოროყვამ. ნედელევი ჯერჯერობით ქართველი ექიმების ზედამხედველობის ქვეშ დარჩება. მასთან იქნება ბულგარეთის ნაკრების ექიმი ბისერ ბოჩევიც.

ბულგარეთის საფეხბურთო კავშირი და ნაკრების შტაბი დიდ მადლობას უხდის სამედიცინო პერსონალს, საქართველოში ბულგარეთის საელჩოსა და პირადად მის მეორე მდივანს, საკონსულო სექტორის ხელმძღვანელ რალიცა დიმიტროვას; აგრეთვე საქართველოს ფეხბურთის ფედერაციის სრულ შემადგენლობას.

ბულგარეთის ნაკრებისა და დელეგაციის სხვა წევრები ჯანმრთელად არიან.

ტოდორ ნედელევის ჯანმრთელობის შესახებ ინფორმაცია მომავალში განახლდება.