პიკეს ხელფასი – სარბიელი

„ბარსელონას” ვარსკვლავმა ჟერარდ პიკემ მის ხელფასთან დაკავშირებულ ჭორებს პასუხი გასცა.

ესპანელმა ჟურნალისტმა ლუის კანუტმა რაღაც მანქანებით „ბლაუგრანას” დიდი ვარსკვლავების ხელფასები მოიძია და აღმოაჩინა, რომ ჟერარდ პიკე, სერხიო ბუსკეტსი და ჯორდი ალბა თანაგუნდელებს შორის ყველაზე დიდ ჯამაგირებს იღებენ. ამასთან, პიკეს გასამრჯელო გაცილებით მეტი ყოფილა, ვიდრე თავად მცველი აცხადებდა.

პასუხად პიკემ ტვიტერზე მის მიერ 2021 წელს აღებული თანხის დეტალები გამოაქვეყნა და დაწერა, რომ მიმდინარე სეზონში მისი ხელფასი ადრინდელზე 50%-ით ნაკლებია.

თავის მხრივ, კლუბმაც გამოაქვეყნა განცხადება, სადაც შეეცადა მოთამაშეების ხელფასებისთვის ნათელი მოეფინა. „ბარსელონა” ამბობს, რომ მის სახელფასო ამბებს ოფისიდან არ გაუჟონავს და რასაც წერენ, ტყუილია.

„ბლაუგრანამ” კანუტის ნახსენები სამივე ფეხბურთელი დაიცვა და განაცხადა, რომ მათ კლუბის სასიკეთოდ ჯამაგირები მოიკლეს.