არსენალმა ჩაილივერპულა

იმ დღეს, როდესაც მერსისაიდზე covid 19-ის ახალი რეგულაციები ამოქმედდა, „არსენალმა” „ლივერპულს” საფხებურთო შეზღუდვებიც დაუწესა: პირველად, 39 მიყოლებული თამაშის შემდეგ, ლივერპულელებმა თავიანთ სტადიონზე გოლი ვერ გაიტანეს. ბოლოს ასეთი რამ 2019 წლის თებერვალში ჩემპიონთა ლიგაზე, „ბაიერნის” წინააღმდეგ მოხდა.

მასპინძელთა მხრიდან გოლის ვერ გატანა საკმარისი აღმოჩნდა იმისათვის, რომ „კარაბაოს” ანუ ლიგის თასის მეოთხედფინალში „არსენალის” გადახალისებული შემადგენლობა გასულიყო. შეხვედრის ბედი 0:0-ის შემდეგ პენალტების სერიამ გადაწყვიტა: ლონდონელთა გერმანელმა მეკარემ ბერნდ ლენომ დივოკ ორიჯისა და ჰარი ვილსონის დარტყმები მოიგერია.

სტუმრებისთვის ეს თამაში იმითაც იყო მნიშვნელოვანი, რომ მათ „ენფილდზე” წინა 9 შეხვედრაში 33 გოლი ჰქონდათ გაშვებული, ამჯერად კი, რომ იტყვიან, „კარი მშრალად” შეინახეს.

ახლა „არსენალი” აღივსება რწმენით, რომ „ლივერპულის” მძლეველს „კარაბაოს თასის” მოპოვებაც შეუძლია, რაც მესამე ჯილდო იქნება ფეხბურთის ასოციაციის თასისა და „ქომუნითი შილდის” (ინგლისის სუპერთასის) შემდეგ, რომლებიც ბოლო ორ თვეში მოიგო.