შაბაშ! ოქროს ბურთი არ იქნება

რაც უნდა სამწუხარო იყოს, 2020 წელს „ოქროს ბურთით“ დაჯილდოება საერთოდ არ მოხდება. შეხსენება ალბათ არ გჭირდებათ, საქართველოში „ფრანს ფუტბოლის“ ოფიციალური პარტნიორი „სარბიელი“ გახლავთ და რეგულარულად მონაწილეობს გამოკითხვებში.

გადაწყვეტილების მიზეზები პოპულარული ფრანგული გამოცემის მთავარმა რედაქტორმა საკმაოდ ლოგიკურად დაასაბუთა.

„სპორტული პერსპექტივიდან გამომდინარე, გამარჯვებულზე შეხედულების ჩამოსაყალიბებლად საჭირო 11 თვის ნაცვლად ჩვენ ორად ორი თვე გვქონდა (იანვარი და თებერვალი). სეზონის დანარჩენი შეხვედრები შედგა ან შედგება უმაყურებლოდ, ხუთი ცვლილებით, ჩემპიონთა ლიგის გადამწყვეტი დუელები კი სულაც ერთმატჩიანია. შესაბამისად, ჯილდო ვერ გაიცემა იმ წელს, როცა ფეხბურთელები არათანაბარ პირობებში არიან. თავადაც არ ვართ აღფრთოვანებულნი ამ გადაწყვეტილებით, მაგრამ „ოქროს ბურთი“ მხოლოდ 2021 წელს დაბრუნდება,” – თქვა პასკალ ფერემ.