გორგოძის ფასი

საქართველოს ნაკრები უკვე იაპონიაშია და მსოფლიო თასისთვის ემზადება. ამომავალი მზის ქვეყანაში გამგზავრებამდე გუნდს მამუკა გორგოძეც შეუერთდა, ვინც წინა დღეს საფრანგეთის ჩემპიონატის მატჩში მიიღო მონაწილეობა. მისმა „ტულონმა“ „ლიონს“ უმასპინძლა და 6:20 დამარცხდა. საინტერესოა, რომ გორგოძე მოედანზე 56-ე წუთამდე იყო და როცა ის მინდვრიდან გავიდა ტულონელები 6:3 იგებდნენ. ამ მარცხმა „ტულონი“ ცხრილის მე-11 საფეხურამდე ჩამოაქვეითა, ხოლო „ლიონი“ ცხრილს სათავეში ჩაუდგა.
მეორე ადგილზე კი „ბორდოა“, რომელმაც „კასტრი“ გასვლაზე 34:32 დაამარცხა და მეორე ტაიმში მის შემადგენლობაში ქართველი ბურჯები ირჯებოდნენ – ლექსო ყაულაშვილი და მილტონ ჰეიგის მიერ დაწუნებული ლაშა ტაბიძე.
„რასინგმა“ გასვლაზე მოქმედ ჩემპიონ „ტულუზთან“ 17:20 წააგო და პარიზელთა სასტარტოში ქართველი იყო – ვასილ კაკოვინი, ვინც მეორე ტაიმის დასაწყისში გამოცვალეს. „აჟენმაც“ გასვლაზე წააგო და მის სასტარტო თხუთმეტეულშიც ქართველი ბურჯი იყო, თანაც ორი. გიორგი თეთრაშვილმა 52 წუთი ითამაშა, ხოლო ანტონ ფეიქრიშვილმა – 32, მათი გუნდი კი ცხრილის მე-12 ადგილზეა.
პრო D2-ის გასული ტური კი უფრო ნაყოფიერი გამოდგა ქართული ლეგიონისთვის. ფრანგული სარაგბო ელიტის მეორე დივიზიონში „ანგულემი“ გალიდერდა, რომელსაც ეს პირველობა ლუკა გოგინავამ მოუტანა. „რასინგის“ ყოფილმა ესპუარმა და საქართველოს 20-წლამდელთა ნაკრების ყოფილმა წევრმა „რუანთან“ საშინაო მატჩის 65-ე წუთზე თამაშში ჩართვა 74-ეზე გამარჯვების ლელოთი აღნიშნა. მისი გუნდი იმ მომენტისთვის 10:16 აგებდა და ქართველის ლელომ „ანგულემს“ სულზე მიუსწრო – 17:16.
მეორეზეა „ოიონა“, რომელმაც „ვანთან“ გასვლაზე 18:22 წააგო. მასპინძელთა შორის 47-ე წუთიდან ბოლომდე კიდევ ერთმა ყოფილმა 20-წლამდელმა ნიკა ნეფარიძემ ითამაშა, ხოლო სტუმრებში პირველიდან 67-ე წუთამდე ექს-ბორჯღალოსანი ირაკლი მირცხულავა ბურთაობდა.
ასევე 1 საათზე მეტი დრო, 62 წუთი ილია კაიკაციშვილმა ითამაშა, ვისმა „ნევერმაც“ „ბიარიცს“ უმასპინძლა და 33:26 დაამარცხა და ამ უკანასკნელის რიგებში 34-ე წუთზე 20 წლის გიორგი ნუცუბიძე გამოჩნდა, რომელიც 22 წუთში რეზერვში დააბრუნეს.
„გრენობლმა“ გასვლაზე „ექსი“ 26:17 დაამარცხა, თან 10 წუთი დუდუ ქუბრიაშვილის სინბინის გამო კაცნაკლულმა ჩაატარა. ვეტერანი ქართველი 49-ზე გაასინბინეს, 10 წუთში მინდორზე აღარ დააბრუნეს, მაგრამ 62-ეზე ისევ მინდორზე უხმეს და თამაშის ბოლომდე აღარც დაუსვენებიათ.
მრავალქართველიანმა „ორიაკმა“ შინ „ბეზიესთან“ 20:24 წააგო, თუმცა მასპინძელთა 14 ქართველიდან მინდორზე მხოლოდ ერთი გავიდა – 62-ე წუთზე თამაშში გიორგი ქართველიშვილი ჩაერთო, ხოლო „ბეზიეში“ ფრანგული დებიუტი ქუთაისელ ბურჯ ჟორჟი სალდაძეს ქონდა, ვინც თამაშში 56-ეზე ჩაერთო და შერკინებაში ბოლო 18 წუთი ქართველიშვილის პირისპირ იდგა.
ლიგის დებიუტანტმა „ვალანს-რომანმა“ „მონტობანთან“ შინ 19:26 წააგო და ცხრილის ფსკერზე დარჩა. მასპინძელთა სასტარტოში მირიან ბურდული იყო, რომელიც 37-ე წუთზე შეცვალეს, მაგრამ 69-ეზე დააბრუნეს და ბოლომდე ათამაშეს.