ინფანტინომ იღლაბუცა

მსოფლიოს ჩემპიონატი ახლახან დაიწყო, ფიფას პრეზიდენტმა ჯანი ინფანტინომ კი უკვე მოასწრო ისეთი რამის თქმა, რაც ზოგისთვის მწარე, ზოგისთვის კი სახალისო გამონათქვამთა შორის შეიძლება პირველ ადგილზე გავიდეს.

ბრაზილიურ CazéTV- თან ინტერვიუში ინფანტინო მსოფლიოს ჩემპიონატის ფინალურ ეტაპზე მონაწილე გუნდების რაოდენობის 48-მდე გაზრდაზე ლაპარაკობდა. მან თქვა, რომ დისკუსიის პროცესში მუნდიალის 64 გუნდამდე გაზრდის ვარიანტიც კი განიხილებოდა და სწორედ ამ დროს იხუმრა:

„ჩვენ გუნდების რაოდენობის 64-მდე გაზრდაზეც ვმსჯელობდით. გვინდოდა საფეხბურთო სამყარო კიდევ უფრო ფართოდ ჩაგვერთო პროცესში, მაგრამ ჯერჯერობით გადავწყვიტეთ 48-ზე გავჩერებულიყავით. 64 გუნდში შეიძლება იტალიაც კი მოხვედრილიყო. ვინ იცის, იქნებ მსოფლიოს ჩემპიონატი ოდესმე 228-მდეც კი გავზარდოთ“.

ფიფას პრეზიდენტის ხუმრობა იტალიაში არ მოეწონათ. მავანმა პარლამენტარმა გაეტანო ამატომ თქვა: „პირველები, ვისაც ჩვენი ეროვნული გუნდის დაღმასვლისა გვრცხვენია თავად ჩვენ ვართ. ინფანტინოს უტაქტო ხუმრობა კი არავის სჭირდება. ასეთი საქციელი იმ ადამიანისგან, რომელიც საფეხბურთო სამყაროს წარმოადგენს – მათ შორის იტალიასაც – მეტად მდაბიურია. ის ბარში შესული უბრალო გულშემატკივარი კი არა, ფიფას პრეზიდენტია და ეს თანამდებობა იტალიის ფეხბურთის ფედერაციის დახმარებითაც მოიპოვა. ინფანტინო ვალდებულია გამოამჟღავნოს პატივისცემა, იყოს გაწონასწორებული და იგრძნოს პასუხისმგებლობა“.

ავტორის პროფილი

პაპუნა კედია: "სარბიელის" ძველი ავტორია. იშვიათად ილია ბაბუნაშვილის ფსევდონიმითაც წერს. ხანდახან ცდილობს იხუმროს, მაგრამ უწყინარია.

უახლესი პოსტები

Post Views: 29