ლიონი გააგდეს! ლიონი გაასაჩივრებს

Georges MIKAUTADZE of Lyon scores goal during the Ligue 1 MCDonald's match between Lyon and Lens at Groupama Stadium on May 4, 2025 in Lyon, France. საფრანგეთის ლიგა 1-ის მეექვსეადგილოსანი „ლიონი’’, სადაც საქართველოს ნაკრების თავდამსხმელი ჟორჟ მიქაუტაძე თამაშობს, კონტროლის მართვის ეროვნულმა დირექტორატმა ოფიციალურად დააქვეითა ლიგა 2-ში. რონისპირელთა კლუბი ჯერ კიდევ 2024 წლის ნოემბერში გააფრთხილეს, რომ საფრთხე ელოდა, მაგრამ მან, როგორც ჩანს, ფინანსური გარანტიები ვერ წარადგინა და დაისაჯა.

„ლიონი’’ ზემოხსენებული დირექტორატის გადაწყვეტილებამ აღაშფოთა და ოფიციალური განცხადება გაავრცელა, სადაც წერია, რომ კლუბი მას აუცილებლად გაასაჩივრებს.

„ბოლო თვეების განმავლობაში ჩვენ დირექტორატთან მჭიდროდ ვთანამშრომლობდით, ვასრულებდით მის ყველა მოთხოვნას ინვესტირებული კაპიტალის რაოდენობასთან დაკავშირებით. ჩვენი მეწილეების მიერ შემოტანილი თანხებისა და „კრისტალ პალასის’’ გაყიდვის შედეგად „ლიონის’’ ფინანსური მდგომარეობა გაუმჯობესდა. ახლა 2025-26 წლების სეზონისთვის საკმარისი რესურსი გვაქვს. ჩვენს ხელთ არსებული სახსრებისა და გუნდის სპორტული წარმატების ფონზე – ზედიზედ მეორე წელიწადია ევროთასების გათამაშებაში ვმონაწილეობთ – გაუგებარი რჩება როგორ მიიღეს ერთ-ერთი წამყვანი ფრანგული კლუბის ლიგა 2-ში დაქვეითების გადაწყვეტილება. ჩვენ დირექტორატის გადაწყვეტილებას აუცილებლად გავასაჩივრებთ, რათა კვლავ წარმოვაჩინოთ ჩვენი ფინანსური შესაძლებლობები, რათა „ლიონი’’ ლიგა 1-ში დარჩეს’’, ― წერია განცხადებაში.

„ლიონს’’ განაჩენის მიღებიდან ერთი კვირა აქვს საფრანგეთის ფეხბურთის ფედერაციის შესაბამის კომიტეტში საჩივრის შესატანად. თუ ეს აპელაცია ჩაუვარდება, რჩება კიდევ ერთი გზა: ჩივილი ეროვნული ოლიმპიური კომიტეტში.