ვალენსიამ ცუდად ითამაშა, მაგრამ ბარახას გული არ გაუტეხავს

„ვალენსიამ” ევროთასებზე გამსვლელი ადგილის მოპოვებაში კონკურენტ „ბეტისთან” ქულები დაკარგა — შინ 1:2 წააგო. მეტოქემ „ღამურებს” აჯობა. ამ შეხვედრაში მასპინძლების ქართველმა მეკარემ გიორგი მამარდაშვილმა კარის დაცვა ვერ შეძლო. მართალია გაშვებული გოლები მისი ბრალი არ ყოფილა, მაგრამ შედეგი სამწუხარო გამოვიდა. შეგახსენებთ, რომ მიმდინარე სეზონში გიორგის 12 მატჩში აქვს კარი „მშრალად” შენახული და წინ კიდევ 6 ტურია.

მატჩის შემდეგ სწორედ ამ ექვს ტურზე გაამახვილა ყურადღება „ჩეების” თავკაცმა რუბენ ბარახამ:

„წინ კიდევ 6 შეხვედრაა. ჩვენ უნდა გავაგრძელოთ მუშაობა და ვეძებოთ მაქსიმალურად ბევრი ქულის მოპოვების შესაძლებლობა. დღეს, სამწუხაროდ, პირველ ტაიმში ჩვენს შესაძლებლობებზე ცუდად ვითამაშეთ. ბურთს ხშირად ვკარგავდით. შესვენების მერე კანიოსის შეყვანით ვცადეთ მდგომარეობის გამოსწორება. პენალტის გატანამ იმედი ჩაგვისახა, მაგრამ საბოლოოდ 1:2 წავაგეთ შეხვედრა, რომელშიც კარგად ნამდვილად ვერ ვითამაშეთ. დასკვნა ის არის, რომ „ბეტისის” კატეგორიის გუნდებთან თუ საუკეთესო ფეხბურთს არ ვაჩვენებთ, დავმარცხდებით.

და მაინც იმედგატეხილი არ ვარ. ეს იგივე ფეხბურთელები არიან, რომელთაც ბევრ შეხვედრაში კარგად ითამაშეს და უფრო მაღალი ადგილის დაკავება შეუძლიათ”.