დი ლორენცოს ინტერიც უმიზნებს

Giovanni Di Lorenzo of SSC Napoli in action during the Serie A TIM match between SSC Napoli and Torino FC - Serie A TIM at Stadio Diego Armando... „ნაპოლის” კაპიტნის ჯოვანი დი ლორენცოს შეძენა „ინტერსაც” მოუნდა. ეს ცნობა იტალიურმა რადიომ Kiss Kiss Napoli -მ გაავრცელა, რომელმაც თქვა, რომ „ნერაძური” ნეაპოლელთა მარჯვენა მცველის გადაბირებას ყველა ხერხით შეეცდება. ამ ინფორმაციამდე რამდენიმე საათით ადრე ცნობილი გახდა, რომ დი ლორენცოს ყიდვით ინგლისის პრემიერლიგაში არიან დაინტერესებულნი. კერძოდ, ინგლისური კლუბებიდან „ასტონ ვილამ” და „მანჩესტერ იუნაიტედმა” გამოთქვეს მისი ყიდვის სურვილი.

იტალიური პრესა წერს, რომ მართალია დი ლორენცომ გასულ ზაფხულს „ნაპოლისთან” 2028 წლამდე გააფორმა კონტრაქტი, მაგრამ მისი მომავალი მაინც ბუნდოვანია. ნეაპოლური გაზეთი „ილ მატინო” წერს, რომ იტალიის ნაკრების ფეხბურთელი, რომელიც აგვისტოში 31 წლისა გახდება, სეზონის ბოლოს „მარადონადან” წასვლას აპირებს. „ილ მატინოს” აზრით, „აძურის” მეპატრონე აურელიო დე ლაურენტისი დი ლორენცოს წასვლას ხელს არ შეუშლის, რადგან გუნდში მისი ძალად დატოვება უკმაყოფილო მოთამაშეების მომრავლების ტოლფასი იქნება.