უეფა როგორც ჭრის, ისე – კერავ…

შეგახსენებთ, ამას წინათ უეფამ უცნაური გადაწყვეტილება მიიღო – რუსეთის 17-წლამდელთა ნაკრებები (ვაჟთა და ქალთა) საერთაშორისო ტურნირებზე დაუშვა.

ევროპული ფეხბურთის მმართველმა ორგანომ ეს გადაწყვეტილება ასე ახსნა: „უეფა იყო პირველი სპორტული ორგანიზაცია, რომელიც უკრაინაში მიმდინარე ომს გამოეხმაურა და 2022 წლის თებერვალშივე მიიღო შესაბამისი ზომები, ჩამოაშორა რა ყველა რუსული გუნდი თავის შეჯიბრებებს, გააუქმა რუსეთში დაგეგმილი ყველა ღონისძიება – უეფა-ს ჩემპიონთა ლიგის ფინალი სანკტ-პეტერბურგში, უეფა-ს სუპეთასის მატჩი ყაზანში და გაწყვიტა სპონსორული კონტრაქტი „გაზპრომთან“. თუმცა, უეფა იაზრებს იმასაც, რომ იმ ქმედებებისთვის, რომლებზეც პასუხისმგებლობა უფროსებს ეკისრებათ, ბავშვები არ უნდა ისჯებოდნენ. სამწუხაროა, რომ გახანგრძლივებული კონფლიქტის გამო, არასრულწლოვანი თაობა საერთაშორისო ფეხბურთში გამოსვლის უფლებას მოკლებულია. შედეგად, აღმასკომმა გადაწყვიტა, რომ რუსეთის არასრულწლოვანი ფეხბურთელების გუნდები ამ სეზონშივე იყვნენ დაშვებული შესაბამის ტურნირებში. რუსული გუნდების ყველა მატჩი უნდა ჩატარდეს ქვეყნის დროშის, ჰიმნის, ნაციონალური ფორმის გარეშე და არა რუსეთის ტერიტორიაზე. აღმასკომი კვლავაც გმობის რუსეთის უკანონო ომს და ადასტურებს, რომ რუსეთის სხვა ყველა გუნდის (კლუბები და ნაკრებები) დისკვალიფიკაცია ძალაში რჩება უკრაინაში კონფლიქტის დასრულებამდე“, – წერია უეფა-ს ვებგვერდზე.

აღმასკომის წევრებს შორის გადაწყვეტილება ერთსულოვანი არ იყო. რუსების საერთაშორისო ტურნირებზე დაშვების წინააღმდეგ წავიდნენ უეფა-ს ვიცე-პრეზიდენტები – დევიდ გილი და ლაურა მაკალისტერი, ასევე ზბიგნევ ბონეკი. როგორც ჩანს, აღმასკომში მომხრეები უფრო მეტნი იყვნენ და გადაწყვეტილება გავიდა… თუმცა, აქ უკვე საქმეში ქვეყნების საფეხბურთო ასოციაციები ჩაერივნენ. პირველი ვინც რუსებთან თამაშზე უარი თქვა, ინგლისის ფეხბურთის ასოციაცია იყო. ცხადია, იქვე გააკეთა განცხადება უკრაინის ფეხბურთის ასოციაციამ. მერე თანმიმდევრულად – პოლონეთი, ლატვია, შვედეთი, დანია, ლიეტუვა, ნორვეგია და სხვები… ეს ქვეყნები რუსებთან თამაშის წინააღმდეგნი იქნებოდნენ იმ შემთხვევაშიც, თუ უეფა სანქციებს დაადებს. ცხადია, ეს არც უეფას აწყობდა.

ნებისმიერი ევროპული ტურნირი, ამ ქვეყნების გარეშე და რუსეთთან ერთად, ცხადია, ბევრად წამგებიანი იქნებოდაა. რუსი ახალგაზრდების საერთაშორისო სარბიელზე დაშვების მოწინააღმდეგე ქვეყნებისა და აღმასკომის წევრების ვინაობას უკვე გაეცნობოდით.

აქ მივადექით კიდევ ერთ საინტერესო დეტალს: ხომ იცით, უეფას აღმასკომის წევრია საქართველოს ფეხბურთის ფედერაციის პრეზიდენტი ლევან კობიაშვილიც…