სულ უკან და უკან…

გაინტერესებთ, რა მოიტანა საქართველოს ფეხბურთის ფედერაციის ხელმძღვანელობის შვიდი წლის წინანდელმა გადაწყვეტილებამ?

გაინტერესებთ, სადამდე დაეშვა ქართული საკლუბო ფეხბურთი? რა მოიტანა წლევანდელმა ევროთასებმა ქართული კლუბებისთვის ?

გაინტერესებთ, რომელ ადგილზეა საქართველო ევროპის საკლუბო რეიტინგში? რომელზეა და რომელზე იყო?

ქართული კლუბები შემდეგ კვირაშიც თუ ისევ წარუმატებლად გააგრძელებენ გამოსვლას, რის შანსიც ძალიან დიდია, ერთ სეზონში დაგროვებული ქულებით ევროპის 49-ე ქვეყანა ვიქნებით. ზუსტად ისე, როგორც შარშან და შარშანწინ.

თუმც, ნუ გაიკვირვებთ, საქართველო ამაზე ცუდ პოზიციაზეც ყოფილა – 2015-2016 წლების სეზონში 51-ე ადგილზე იდგა. 2017-2018 წლების სეზონში მხოლოდ ერთ ქვეყანას გაასწრო – კოსოვოს.

საქართველოს საუკეთესო მაჩვენებელი 1994-1995 წლებში ჰქონდა, როცა ერთადერთი კლუბი გვყავდა. თბილისის „დინამომ“ მაშინ ოთხიდან სამი მატჩი მოიგო და ექვსი სარეიტინგო ქულა დააგროვა, რამაც ქვეყანას პორტუგალიასთან ერთად X-XI ადგილები დადააკავებინა.

მეტი თვალსაჩინოებისთვის კი ამ ცხრილს დახედეთ და ყველაფერი ნათელი გახდება… არადა, ხომ გახსოვთ, როცა ეროვნული ჩემპიონატი ფორმატი შეიცვალა და ევროპაში პოპულარული შემოდგომა – გაზაფხულის სისტემიდან, ეროვნული ლიგა მხოლოდ ჩრდილოეთის ქვეყნებისთვის მისაღებ გაზაფხული – შემოდგომაზე გადავიდა, ფედერაციის ჩინოსნებმა, ასე თქვეს – ცვლილება ევროტურნირებზე ქართული კლუბების ინტერესების გათვალისწინებით მივიღეთ, საერთაშორისო მატჩებს უკეთეს ფორმაში რომ შეხვდნენო… შედეგი სახეზეა, ფეხბურთის ფედერაცია კი არაფერს იმჩნევს…

ავტორის პროფილი

ლუკა თალაკვაძე: ლუკა თალაკვაძე ნამდვილი სარბიელელია. ყველას შემწე, გვერდში მდგომი, ალალი და უსაყვედურო. ჟურნალისტის პროფესიის ქიციც იცის და ქიცმაცურიც.