„ნაპოლის” გულშემატკივრები დღითიდღე რწმუნდებიან, რომ ლუჩანო სპალეტი გუნდს ტოვებს. ამ თემას „ლა რეპუბლიკაც” გამოეხმაურა. გაზეთმა დაწერა, რომ „პარტენოპეელთა” პრეზიდენტმა აურელიო დე ლაურენტისმა სპალეტის შემცვლელთა სია შეადგინა, რომელშიც საბოლოოდ ხუთი კანდიდატი დარჩა. ერთ-ერთი მათგანი ესპანეთის ნაკრების ყოფილი თავკაცი ლუის ენრიკეც ყოფილა.
რომაულმა საზოგადოებრივ-პოლიტიკურმა გაზეთმა დაწერა: „დე ლაურენტისის სიაში უცხოელი მწვრთნელებიც შედიან. აქ, იულიან ნაგელსმანის გარდა ყურადღებას იპყრობს ესპანელი ლუის ენრიკეს სახელიც. ორივე ვარიანტი ძალიან მიმზიდველია, რადგან სადღეისოდ ნაგელსმანიცა და ენრიკეც თავისუფლები არიან. იტალიელთაგან კი ასეთი სამეული გამოიკვეთა: ჯან პიერო გასპერინი (თუმც ის გულშემატკივარს გულზე დიდად არ ეხატება), ტიაგო მოტა და ვინჩენცო იტალიანო”.
