თბილისის „დინამო“ და საერთოდ ქართული წყალბურთის გუნდი წელს ევროპის ყველაზე პრესტიჟულ ტურნირში, ჩემპიონთა ლიგაში პირველად ჩაერთო. რევაზ ჩომახიძის გუნდს ეს პატივი „უაილდ ქარდის“ საშუალებით ერგო.
„დინამომ“ მძიმედ დაიწყო და ზედიზედ 9 მატჩი წააგო, შემდეგ ისტორიული გამარჯვებაც იზეიმა – 3 მარტს თბილისის საცურაო აუზ „ოლიმპიკში“ გამართულ შეხვედრაში, რომელიც მსოფლიო პანდემიის გამო მაყურებლების გარეშე ჩატარდა, დინამოელებმა ფრანგულ „მარსელს“ 15:12 სძლიეს და ტურნირიც შეწყდა.
ჯგუფურ ეტაპზე კიდევ 4 ტური იყო დარჩენილი, მაგრამ როგორი გაგრძელება ექნება, ჯერჯერობით, გაურკვეველია.
თუმცა, ცნობილია, რომ „დინამო“ მომავალ სეზონში ჩემპიონთა ლიგაში ითამაშებს. ისევ ჯგუფურ ეტაპზე და კვლავ „უაილდ ქარდის“ დახმარებით.
როგორც გაირკვა, წინა სეზონისგან განსხვავებით, უმთავრეს ევროპულ საკლუბო ტურნირში 16 კლუბის ნაცვლად, ამჯერად 12 გამოვა. „დინამო“ იმ 10 გუნდს შორის მოხვდა, რომელთაც „უაილდ ქარდი“ ერგოთ. ჯგუფურ ეტაპზე ასევე ითამაშებენ ევროპული გრანდები: „ფერენცვაროში“ (უნგრეთი), „ბარსელონეტა“ (ესპანეთი), „იადრანი“ (მონტენეგრო), „დუბროვნიკი“ (ხორვატია), „მარსელი“ (საფრანგეთი), „ოლიმპიაკოსი“ (საბერძნეთი), „პრო რეკო“ (იტალია), „ჰანოვერი“ და „შპანდაუ“ (ორივე გერმანია).
კიდევ ორ გუნდს ოქტომბერში გასამართი საკვალიფიკაციო ტურნირი გამოავლენს. ჯგუფური ეტაპი კი 11 ნოემბრიდან დაიწყება და 12 გუნდი ორ ჯგუფში გადანაწილდება. 4-4 საუკეთესო კი, რვათა ფინალში გავა და 4-6 ივნისს ჩემპიონობისთვის ჰანოვერში იბრძოლებს.
