კრიშის ბუგატი 9,5 მილიონად

კრიშტიანუ რონალდუ და მისი აგენტი ჟორჟე მენდეში სრულად დააფინანსებენ პორტუსა და ლისაბონში მდებარე ორ კლინიკაში კრიტიკული მედიცინის სამი ბლოკის აღჭურვას.

თითოეული ბლოკი 10 პაციენტზე იქნება გათვლილი და მათ შემომწირველთა სახელებს დაარქმევენ.

ამას გარდა, რონალდუ დათანხმდა, „იუვენტუსში“ კუთვნილი 21-მილიონიანი გასამრჯელო შექმნილი კრიზისიდან გამომდინარე 3,8 მილიონი ევროთი შეიმციროს.

ყველაფრის მიუხედავად, კრიში ოპტიმისტია – საკუთარი ავტოსაჯინიბო კიდევ ერთი სუპერმანქანით შეავსო. გერმანული „ბილდის“ ინფორმაციით ფირმის 110 წლისთავთან დაკავშირებით „ბუგატიმ“ ლიმიტირებული მოდელი Centodieci გამოუშვა. ასეთი მოდელი სულ 10 დამზადდება და მისი ფასი 9,5 მილიონი ევრო იქნება.

რონალდუს სოლიდურ ავტოპარკში აქამდე უკვე იდგა „ბუგატის“ ორი მოდელი – Veyron და Chiron.

ავტორის პროფილი

გიორგი ნოზაძე: მას შეეძლო, დილის 11 საათისთვის გაზეთის ორი გვერდი მზად ჰქონოდა და გადაერეკა თანამშრომლებისთვის - ნუ შეწუხდებით, სამსახურში ნუღარ მოხვალთ, საქმე გაკეთებულია. ფეისბუკის ნამდვილი ფეისი. ის გახლავთ სოციალურ ქსელში "მოამბეც" და "ვრემიაც".