„ყვარელმა” ხელვაჩაურში მოიგო

საქართველოს ქალ ხელბურთელთა ჩემპიონატი ხელვაჩაურში გაგრძელდა. პირველ შეხვედრაში „აჭარამ” დაამარცხა თბილისის „მამული” 29:19.

თავიდან „მამული” დაწინაურდა, მაგრამ ტაიმი აჭარელებმა მოიგეს (13: 11), შესვენების შემდეგ კი უპირატესობა გაზარდეს და საბოლოოდ ათბურთიანი სხვაობით მოიგეს. ყველაზე შედეგიანები იყვნენ გამთამაშებელი ნინო კომახიძე (9 გოლი) და ხაზის მოთამაშე მარიამ დვალიშვილი (8). თბილისელთაგან 7 გოლი გაიტანა ნანა ველიჯანაშვილმა.

მეორე დღეს „აჭარა” დამარცხდა „ყვარელთან” — 26:31. მოგების შემთხვევაში მასპინძლები მეორე ადგილზე გადადოდნენ. აჭარელებმა 2017 წლის ჩემპიონსა და ბოლო გათამაშების ბრინჯაოს პრიზიორს საკმაო წინააღმდეგობაც გაუწიეს, პირველი ტაიმის შემდეგ ყვარელი მხოლოდ 1 ბურთით იყო წინ, (14:13), მთელი მეორე ტაიმის განმავლობაში კი სხვაობა 2-3 გოლს არ სცილდებოდა. ასე გაგრძელდა ბოლო წუთებამდე, მაგრამ ბოლოს „ყვარელის” უპირატესობა გამოიკვეთა — 31:26. გამარჯვებულ გუნდში 9-9 გოლი გაიტანეს გამთამაშებელმა თინათინ ქიტესაშვილმა და მარჯვენაფლანგელმა მარიამ თავღორიშვილმა, ხოლო მასპინძელთა შორის საუკეთესო იყო ხაზის მოთამაშე მარიამ დვალიშვილი – 13 გოლი.

უსახსრობის გამო ხელვაჩაურში ვერ ჩავიდა „სამტრედია”, რომელსაც „ყვერელთან” და „მამულთან” წაგება 0:10 ჩაეთვალა.

ხელბურთელ ქალთა ჩემპიონატი 2020 წლის იანვარში განახლდება. სულ გუნდები ორ წრედ ითამაშებენ, 4 საუკეთესო კი საქართველოს ჩემპიონს ფინალური ოთხეულის ფორმატით გამოავლენს.

სადღეისოდ უმაღლესი ლიგის რვავე გუნდს 5 მატჩი აქვს გამართული. 10 ქულით ლიდერობს თბილისის „ქარიშხალა”, შემდეგ 8 ქულით მოდის „ყვარელი”, 5 აქვთ „აჭარასა” და ფოთის „ოქროს ვერძს”, 4 — „მამულს”, 2 კი „პეგასს”.