818 დღე – სარბიელი

„რეალმა” ახალი სეზონი გამარჯვებით დაიწყო — ვიგოში „სელტას” 3:1 მოუგო. მადრიდელთა გარშემო ბოლოხანს ამტყდარი ხმაურის გამო ამ გამარჯვებამ იმაზე მეტი ყურადღება მიიპყრო, ვიდრე სხვა დროს მიიპყრობდა. მოგეხსენებათ, წინა დღეს, „რეალის” მთავარმა მოქიშპემ, „ბარსელონამ”, ბილბაოში წააგო (0:1), რაც იმას ნიშნავს, რომ ლა ლიგის პირველი ტურის მერე „ლოს ბლანკოსი” ესპანეთის ჩემპიონატის ცხრილში „ბლაუგრანაზე” წინ არის. თურმე ნუ იტყვით და ბოლოს, ასეთი რამ, 818 დღის წინ ყოფილა.

დავაზუსტოთ: ბოლოს „რეალი” „ბარსელონაზე” წინ 2016-17 წლების სეზონის ბოლოს იყო, როდესაც ის ჩემპიონი გახდა. მას მერე ყოფილა შემთხვევები, როდესაც კასტილიელები კატალონიელებს ქულებით გატოლებიან, მაგრამ ცხრილში მათზე მაღლა არ ყოფილან. წინა სეზონში, იყო მომენტი, როდესაც „ბარსა” „რეალს” 19 ქულით უსწრებდა — მანამდე ასეთი დიდი სხვაობა ისტორიაში არ ყოფილა.

საინტერესოა, რომ ახალი სეზონის პირველი ტურის შემდეგ „რეალი” „ბარსელონაზე” წინ ბოლოს 2007-08 წლების სეზონში იყო. ვერ დავიჩემებთ, რომ ეს რამეს ნიშნავს, მაგრამ იმ სეზონში ჩემპიონები მადრიდელები გახდნენ. მეორე ტურში „რეალი” „ვალიადოლიდს” მასპინძლობს, ხოლო „ბარსა” „ბეტისს”.