გაიხადეთ! – სარბიელი

„გრასჰოპერსი“ შვეიცარიის ყველაზე ტიტულოვანი გუნდია, მაგრამ ბოლო წლებში მის შესახებ ბევრი არაფერი გვსმენია. ან რა უნდა გვსმენოდა, როცა ბოლოს ჩემპიონი 2003 წელს გახდა, სამეულს კი 2014-ის შემდეგ არ გაკარებია. სამეული კი არა, გუნდი ცხრილის ფსკერზეა და 68 წლის განმავლობაში პირველად ქვედა ლიგაში დაქვეითდდა.

ოფიციალურად გავარდნა „ლუცერნთან“ კვირას გამართულ მატჩს უნდა დაედასტურებინა. შეხვედრა მაშინ შეწყდა, როცა „ლუცერნი“ 4:0 იგებდა. „გრასჰოპერის“ ფანებმა, რომლებიც გუნდს გასვლით შეხვედრაში ახლდნენ, მოედნის კიდესთან მოიყარეს თავი და შესვლით დაიმუქრნენ. მათთან დასაშოშმინებლად ფეხბურთელები მივიდნენ. ქომაგებმა კი ფეხბურთელებს მაისურების და ტრუსების გახდა მოსთხოვეს – მათი ტარების ღირსი არ ხართო.

სიტუაცია დაძაბული იყო და ფეხბურთელთა უმეტესობამ ფორმა გაიხადა. პაუზა საკმაოდ ხანგრძლივი გამოდგა და მთავარმა მსაჯმა შეხვედრა აღარ გააგრძელა. აწ უკვე მეორელიგელ „გრასჰოპერსს“ ტექნიკური წაგება ჩაეთვალა.

ავტორის პროფილი

ლუკა თალაკვაძე: ლუკა თალაკვაძე ნამდვილი სარბიელელია. ყველას შემწე, გვერდში მდგომი, ალალი და უსაყვედურო. ჟურნალისტის პროფესიის ქიციც იცის და ქიცმაცურიც.