ჟორჟმა მომხდარი საიდუმლოდ დატოვა

L’OL en crise, les supporters convoquent les joueurs ჟორჟ მიქაუტაძის „ლიონმა’’ „ტულუზთან’’ 0:0 დამთავრებულ შეხვედრაში კარში სულ სამჯერ დაარტყა. ძნელი სათქმელია რამდენად ობიექტურად ასახავს flashscore-სა და whoscored-ის სტატისტიკაზე დაყრდნობილი შეფასებები ფეხბურთელთა თამაშს, მაგრამ ორივე პორტალმა გიორგის თანაგუნდელთა შორის ყველაზე დაბალი ქულა დაუწერა: 6.5 და 5.8.

გუნდის თამაშით განაწყენებულმა ლიონელ გულშემატკივართა ცნობილმა დაჯგუფებამ Bad Gones („ბედ გონ’’ ანუ „ცუდი ბიჭები’’) მატჩის შემდეგ ფეხბურთელების ტრიბუნასთან მოხმობა მოახერხა. ალექსანდრ ლაკაზეტის არყოფნაში მოთამაშეთა მხრიდან ლიდერის როლი კაპიტანმა კორენტენ ტოლისომ ითავა. მის გარდა „ცუდი ბიჭების’’ ლიდერებთან მივიდნენ მიქაუტაძე, რაიან შერკი და მწვრთნელი პიერ საჟი. გაიმართა ხანგრძლივი დისკუსია. რაღაც მომენტში ვითარება დაიძაბა, მხარეებმა ტონს აუწიეს, მაგრამ საბოლოოდ ყველაფერი ფეხბურთელების გამხნევებითა და ერთობით დასრულდა.

მოგვიანებით DAZN-მა მიქაუტაძეს ჰკითხა, თუ რა მოხდა დისკუსიის დროს, მაგრამ საქართველოს ნაკრების თავდამსხმელმა ამბის გასაჯაროებისგან თავი შეიკავა: „ეს ჩვენ და გულშემატკივრებს გვეხება და ჩვენს შორის დარჩება, – თქვა მან და დასაძინა, – ვიბრძოლეთ, მაგრამ გოლის გასატანად ბოლო პასი და კარგი დარტყმა გვაკლდა. სამაგიეროდ, ოთხშაბათთან შედარებით (მარცხი სათასო შეხვედრაში ფრანგული იერარქიის მეოთხე ლიგელ „ბურჟუან ჟალიუსთან’’) თავი სხვანაირად წარმოვაჩინეთ’’.

შემდეგი შეხვედრა „ლიონს’’ ევროლიგაზე 23 იანვარს სტამბოლში „ფენერბაჰჩესთან’’ აქვს, 26-ში კი ლიგა 1-ის შეხვედრაში „ნანტს’’ უნდა ესტუმროს.