ქალები მესამეზე, კაცები მეთერთმეტეზე

საჭადრაკო ოლიმპიადის მეექვსე ტურში საქართველოს ქალთა და კაცთა გუნდებმა მორიგი ქულები მოიპოვეს და მედლებისთვის ბრძოლაში სერიოზულად ჩაერთვნენ. ეს უფრო კაცთა ნაკრებზე ითქმის, რომელმაც ესპანეთის საკმაოდ კარგი ნაკრები 2,5:1,5 დაამარცხა. ჩვენებს გამარჯვების ქულა მიხეილ მჭედლიშვილმა მოუტანა, ვინც ალექსი შიროვი დაამარცხა. თეთრებით მოთამაშე ქართველმა დებიუტშივე მიიღო უპირატესობა და 26-ე სვლაზე მეტოქეს დანებება აიძულა; ნიკოლოზ კაჭარავა და დავიდ ენტონი 37-ე სვლაზე დაზავდნენ; ბაადურ ჯობავამ და ალან პიშომ ზავი ერთმანეთს 57-ე სვლაზე გამოუცხადეს; ლევან ფანცულაიას კი, დებიუტში უარესი პოზიცია ჰქონდა, პარტიის შუაში წაგებაც გარდაუვალი ჩანდა, მაგრამ ხაიმე სანტოსს კომბინაცია და სვლები გამოუცნო, რის შემდეგ დაფაზე საყაიმო სიტუაცია დადგა.

კაცთა შორის 12 ქულით ერთპიროვნული ლიდერი ინდოეთი გახდა; 11-11 ქულა აქვთ ჩინეთს, ირანსა და ვიეტნამს; შემდეგ მოდის 10-ქულიანთა ჯგუფი, რომელთა შორის საქართველოც არის, მაგრამ დამატებითი მაჩვენებლებით მეთერთმეტე ადგილზეა.

ქალთა ნაკრებმა ასეთივე ანგარიშით მონღოლეთს მოუგო – 2,5:1,5. თუ კაცებს გამარჯვება პირველმა დაფამ მოუტანა, აქ მეოთხე დაფაზე მოთამაშე სალომე მელიამ იყოჩაღა. არადა, 27-ე სვლაზე ენდერნებაირ ჰუსლენს უეჭველად მოსაგები პოზიცია შეექმნა, მაგრამ იქვე ჯერ ერთი შეცდომა დაუშვა, 35-ე სვლაზე მეორეც მიაყოლა და მოსაგები სიტუაცია შავებით მოთამაშე მელიასკენ გადაიხარა, რაც ჩვენიანმა ბოლომდე მიიყვანა და მეტოქე 58-ე სვლაზე დანებდა; ნანა ძაგნიძემ, ლელა ჯავახიშვილმა და ბელა ხოტენაშვილმა საკუთარი პარტიები ყაიმით დაასრულეს. ექვსი ტურის შემდეგ ინდოეთს 12 ქულა აქვს; პოლონეთი და საქართველო 11-11 ქულით მეორე და მესამე ადგილებზე არიან. ხვალ ოლიმპიადაზე დასვენების დღეა…