გარსია: ხვიჩას ჯერ კიდევ სჭირდება სათამაშო დრო რათა თავისი ბრწყინვალე ფეხბურთი გვაჩვენოს

Rudi Garcia, Head Coach of Napoli, reacts during the UEFA Champions League match between SC Braga and SSC Napoli at Estadio Municipal de Braga on... „ნაპოლიმ” ჩემპიონთა ლიგის ჯგუფური ეტაპის პირველ შეხვედრაში სტუმრად მოუგო „ბრაგას” 2:1. მატჩის დამთავრების შემდეგ ნეაპოლელთა მწვრთნელმა რუდი გარსიამ თქვა:

„პირველ ტაიმში კარგად ვითამაშეთ. ზოგ მომენტში ალბათ იღბალმა ზურგი გვაქცია. იყო ეპიზოდები, როდესაც ბურთი ძელს მოხვდა და იყო ეპიზოდი, როდესაც ის მცველმა გამოიტანა. შესვენების შემდეგაც კარგად დავიწყეთ, მაგრამ შემდეგ წეზოლა მოვასუსტეთ და ყველაზე დიდი შეცდომა ეს იყო. როდესაც „ბრაგამ” ანგარიში გაათანაბრა, ჩვენ მტკიცე ხასიათი გამოვავლინეთ. ბოლოს კი ჟელინსკის პასს მეტოქის ავტოგოლი მოჰყვა. ეს იყო ყისმათი, რომელიც მანამდე გვაკლდა”.

შემდეგ „ნაპოლის” ფრანგმა მწვრთნელმა დასძინა: „დიახ, დი ლორენცოს გოლის შემდეგ შვებით ამოვისუნთქე. ეს ამ დროისთვის დამახასიათებელი ქცევა არ არის, მაგრამ ხელიდან გაშვებული ბევრი საგოლე მომენტის შემდეგ, პირველი ტაიმის მიწურულს ჩიხიდან გამოსვლა ნამდვილად გამიხარდა. ჩვენი გუნდი შეტევაში ძლიერია და ეს დღესაც კარგად გამოჩნდა. ჩემპიონთა ლიგის მონაწილე გუნდის დამარცხება ძნელი საქმეა. სამი ქულით კმაყოფილები ვართ. ახლა ჩვენს გულშემატკივარს „რეალი” აჩვენებს ლამაზ შეხვედრას.

ოსიმენი და კვარა? ვიქტორი კარგ ფორმაშია და ეს დღეს 90 წუთის განმავლობაში ინტენსიური თამაშით აჩვენა. ხვიჩას ჰქონდა კარგი ეპიზოდები. მაგალითად, პირველ გოლში მიიღო მონაწილეობა, მაგრამ რიტმი აშკარად აკლია. მას კიდევ სჭირდება სათამაშო დრო, რათა თავისი ბრწყინვალე თამაში გვაჩვენოს”.