ჟორჟე: ფავორიტი ნაპოლია, ჩვენ კი მოგება გვინდა

Head coach, Artur Jorge of Sporting Braga during the UEFA Champions League Third Qualifying Round: First Leg match between Sporting Braga v TSC Backa... ჩემპიონთა ლიგაში „ბრაგასა” და „ნაპოლის” ჯგუფური ეტაპის პირველი შეხვედრის წინ პორტუგალიური გუნდის მწვრთნელმა 51 წლის არტურ ჟორჟემ პრეს კონფერენციაზე თქვა:

„თეორიულად ფავორიტი „ნაპოლია”, მაგრამ ჩვენ გამარჯვების ამბიცია წუთით არ დაგვიკარგავს. ველი, რომ მეტოქე ძალიან ძლიერ ფეხბურთს ითამაშებს. ვნახე ნეაპოლელთა ბოლო ორი მატჩი „ლაციოსა” და „ჯენოასთან”. გამიჩნდა ეჭვი, რომ გენუაში რამდენიმე ფეხბურთელმა ძალა დაზოგა ხვალისათვის ფორმაში რომ ყოფილიყო. ვიმეორებ, მეტოქე ძალიან ძლიერია, მაგრამ იმაზე ფიქრს, თუ რას უნდა ველოდოთ „ნაპოლისგან”, ჯობს იმაზე ვიზრუნოთ, ჩვენ რას შევთავაზებთ მოწინააღმდეგეს მოედანზე. მე ყველა ღონეს ვხმარობ, რომ „ბრაგა” გამარჯვებისთვის მზად იყოს”.

შემდეგ, არტურ ჟორჟემ ილაპარაკა იმის შესახებ, თუ როგორ ფეხბურთს თამაშობს „ნაპოლი” ახალი მწვრთნელის რუდი გარსიას ხელში:

„ჩემი აზრით ეს გუნდი 4-3-3 სქემაზე დაყრდნობით, ძალიან ღია ფეხბურთს თამაშობს. მას უძლიერესი თავდამსხმელები ჰყავს. მისი მიზანი აქცენტის მუდამ შეტევაზე გადატანაა, რათა თავისი ფორვარდების ძალა გამოიყენოს და მათ გოლის გატანის შესაძლებლობა მისცეს”.

და ბოლოს ჟორჟემ დასძინა: „როგორ შემადგენლობას გამოვიყვან? მე ეს უკვე მოფიქრებული მაქვს. ფეხბურთელებს შორის კონკურენცია პრობლემა არ არის. ყველას ერთი სურვილი აქვს — გამარჯვება. ხვალ ურთულესი შეხვედრა გველის, მაგრამ მიზანი ყოველთვის მოგებაა”.