ნაპოლისთან მოგება ხომ ამხანაგურებშიც ყველას უნდა

Khvicha Kvaratskhelia of SSC Napoli during the Frendly match between SSC Napoli and Lille OSC at Stadio Diego Armando Maradona Naples Italy on 21... ანდრეა სტრამაჩონი 2012-13 წლებში „ინტერის” მწვრთნელი იყო. შემდეგ მან იმუშავა „უდინეზეში”, „პანათინაიკოსში”, პრაღის „სპარტაში”, ირანისა და ყატარის კლუბებში, ახლა კი იტალიის საზოგადოებრივი მაუწყებლის RAI-ს ტექნიკური კომენტატორია. მან Radio Kiss Kiss-ს ინტერვიუ მისცა, სადაც „ნაპოლიზე” და მის წაგებულ ამხანაგურ შეხვედრებზე ილაპარაკა.

შეგახსენებთ, რომ „აძური” ბოლო ორ ამხანაგურ შეხვედრაში ჯერ ესპანურ „ვილიარეალთან” დამარცხდა — 2:3, შემდეგ კი ფრანგულ „ლილთან” — 1:4.

„ის ფაქტი, რომ „ნაპოლიმ” ამხანაგური შეხვედრები წააგო, ერთი მიზეზით აიხსნება — მეტოქეებს მასთან გამარჯვება უნდათ. ეს კულტურა იტალიელებს არ გვაქვს. ჩვენ ამხანაგურ თამაშებში მიზნად მოგებას არ ვისახავთ”, — თქვა სტრამაჩონიმ.

იტალიაში ბევრმა სპეციალისტმა შემოდგომა-ზამთრის პერიოდი ზაფხულის პრე-სეზონს შეადარა და თქვა, რომ ამხანაგურ შეხვედრებში ნაჩვენები შედეგები გუნდების რეალურ ძალაზე არ მეტყველებს. სტრამაჩონიც ამ აზრისაა. ის ფიქრობს, რომ ლუჩანო სპალეტი ამხანაგურ შეხვედრებში წაგებებს აკვირდება და სასიკეთოდ გამოიყენებს.

„ეჭვი არ მეპარება, რომ სპალეტიმ კარგად იცის როგორ გამოიყენოს ეს წაგებები გუნდის სასარგებლოდ. ის სერია A-ს განახლებას კარგად შეხვდება. შემიძლია დაგარწმუნოთ, რომ 4 იანვარს „ნაპოლი” კარგად ითამაშებს მიუხედავად იმისა, რომ ძლიერი მეტოქე („ინტერი”) ეყოლება”, — თქვა სტრამაჩონიმ.