ბუდუს ამბავი…

უნგრეთის ჩემპიონატის ბოლო ტურში „ფეჰერვარმა“ შინ 0:1 წააგო „უიპეშტთან“. მასპინძელთა ჩვენიანი თავდამსხმელი ბუდუ ზივზივაძე მოედანზე 75-ე წუთზე შევიდა.

მატჩის დასრულების შემდეგ ბუდუმ მეტოქე გუნდის ფეხბურთელს მაისურა გაუცვალა და „უიპეშტის“ გულშემატკივრებსაც მიესალმა, რომლებიც მის სახელს სკანდირებდნენ – ის ხომ შარშან „ფეჰერვარმა“ სწორედ „უიპეშტში“ გაანათხოვრა, სადაც საქართველოს ნაკრების თავდამსხმელმა 14 მატჩში 11 გოლი გაიტანა. შესაბამისად, ბუდუს იქ აფასებენ…

„ფეჰერვარის“ გულშემატკივრებმა კი ზივზივაძეს საქციელი დაუწუნეს, ხელმძღვანელებმა კი, პირველ გუნდთან ვარჯიშის უფლება აღარ მისცეს. ასე იქნება იანვრამდე.

მომხდართან დაკავშირებით, ზივზივაძემ სოციალურ ქსელში დაწერა.

„მსურს, კლუბ ფეჰერვარის და ჩემ გულშემატკივრებს ვუთხრა სრული სიმართლე, რომელიც 10 ოქტომბერს უიპეშტთან მატჩის შემდეგ მოხდა. თამაშის დასრულების შემდეგ სტუმარი გუნდის ქომაგებისადმი პატივისცემის გამოხატვამ ჩვენი კლუბის გულშემატკივართა განაწყენება გამოიწვია, რომელიც ჩემთვის გასაგებია. რაც შეეხება მაისურის გაცვლას, ჩემ ყოფილ თანაგუნდელს გავუცვალე მაისური და გაუცნობიერებლად და ინსტიქტურად გადავიცვი ტანზე. ამ ქმედებამ ფეჰერვარის გულშემატკივრებში დიდი უკმაყოფილება გამოიწვია. ეს არ ყოფილა არც რაიმე სახის პროვოკაცია და არც წინასწარ დაგეგმილი ქმედება. თუ ვინმე ამ კონკრეტული ქმედებით თავს შეურაცხყოფილად გრძნობს, ბოდიშს ვუხდი. ახლაც გულწრფელი ვარ, და მაშინაც გულწრფელი ვიყავი, როდესაც უიპეშტში თამაშის დროს ფეჰერვარის კარში გატანილი გოლი არ აღვნიშნე, რადგან ჩემთვის ფეხბურთი და გულშემატკივარი განუყოფელი ნაწილია. კლუბის სტაფის ყველა წევრმა იცის, რომ მათ მიმართ დიდი სიყვარული და პატივისცემა მაკავშირებს. ყველა იქ მომუშავე ადამიანი განსაკუთრებულია და მათ გარეშე ეს კლუბი ვერ იარსებებდა. ყოველთვის მაქსიმუმს ვაკეთებ ჩემი კლუბისთვის, არ აქვს მნიშნვნელობა სასტარტო შემადგენლობაში ვარ, თუ მხოლოდ რამდენიმე წუთით შევდივარ მოედანზე. მჯერა, რომ გულშემატკივრები, რომლებსაც გამორჩეულად უყვართ ჩვენი კლუბი სწორად გაიგებენ ჩემ ნათქვამს და ფეჰერვართან ერთად კიდევ ბევრი სასიამოვნო საფეხბურთო საღამო გვექნება. კიდევ ერთხელ მინდა ბოდიში ვუთხრა მათ, ვინც ჩემი ჟესტის გამო დამცირებულად იგრძნო თავი. განსაკუთრებით, RBD ულტრასებს, ჩვენი კლუბის განსაკუთრებულ გულშემატკივრებს“, – წერს ზივზივაძე.