ფინალამდე – ბელგიასთან 86:0!

No description available. ნორჩმა ბორჯღალოსნებმა საქართველოში მიმდინარე ევროპის 18-წლამდელთა ჩემპიონატის ნახევარფინალური სტადიაც იოლად გაიარეს და ფინალში გავიდნენ.

ნახევარფინალების დღე რუსთავში მე-5 ადგილისთვის პირველი ნახევარფინალით გაიხსნა, სადაც საოცარი შედეგი დაფიქსირდა – გერმანიის U18-მა რუმინელებს 27:17 მოუგო. ზოგადად, „არასარაგბო“ გერმენელების მიერ „სარაგბო“ რუმინელების დამარცხება სენსაციად უნდა მივიჩნიოთ, თუმცა, მეორე მხრივ, სადაც რუმინეთი ესპანეთთან თავს უფლებას აძლევს 0:102 დამარცხდეს, იქ 5 ოქტომბრის შედეგიც ნორმაა…

მე-5 ადგილისთვის გადამწყვეტ მატჩში გერმანელები ნიდერლანდელებს დაუპირისპირდებიან. ამ უკანასკნელებმა თბილისში, ნუცუბიძის პლატოზე მდებარე სტადიონზე ჩეხებს იოლად მოუგეს – 27:5. ჩეხეთის ჭაბუკთა ნაკრები კი გასაცოდავებულ რუმინელებს მე-7 ადგილს შეეცილება.

მომდევნო მატჩი რუსთავში გაიმართა და პირველი ფინალისტის ვინაობაც იქ გაირკვა. პორტუგალიამ დაძაბულ და თვალსასეირო ჯახში ესპანეთს 24:21 აჯობა და ჩემპიონობისთვის უკვე ქართველებთან იბრძოლებს.

ზურაბ ამონაშვილის რაზმმა კი ოთხშაბათი პლატოზე დიდებული თამაშითა და ლელოების მრავალფეროვანი სიუხვით დააგვირგვინა. 86:0 – ეს ანგარიში ასტრონომიულად კი გვეჩვენება, მაგრამ 18-წლამდელ ქართველებსა და ბელგიელებს შორის არსებული სხვაობა გაცილებით მეტია, ვიდრე დაფიქსირებული ანგარიში. კვლავ გვიწევს იმის კონსტატირება, რომ ასეთი შეხვედრებიდან სარგებელს მხოლოდ სუსტი იღებს…

ტურნირი კვირას, 9 ოქტომბერს დასრუდება. როგორც ზემოთ ითქვა, მე-7 ადგილისთვის ერთმანეთს ჩეხეთი და რუმინეთი შეერკინებიან, მე-5 ადგილს გერმანია და ნიდერლანდები გაითამაშებენ, მესამე საპრიზო ადგილისთვის ესპანეთი და ბელგია შეებმებიან ერთმანეთს,

პირველობის გვირგვინი კი ფინალი იქნება, სადაც საქარველოს 18-წლამდელთა ნაკრები ჩემპიონის ტიტულის შესანარჩუნებლად პორტუგალიელი თანატოლების დამარცხებას ეცდება. დიდი ალბათობით ასეც მოხდება.

ავტორის პროფილი

სლავა გასპაროვი: სლავა გასპაროვი - კაცი, რომელმაც თბილისის ყველა ქუჩა და ყველა ჩიხი იცის. ასევე იცის, სად რომელი ნომერი მარშრუტკა და ავტობუსი მიდის. რაც მთავარია, მშვენიერი მოქართულეა.