ზიდანი: ეს ფეხბურთი არ იყო

„რეალის” მწვრთნელი ზინედინ ზიდანი მატჩისშემდგომ პრეს-კონფერენციებზე ჩვეულებრივ თავშეკავებული და დიპლომატიურია, მაგრამ პაპმლონაში 0:0-ს შემდეგ ბრაზი ვერ დამალა. ამ შეხვედრაში, „ოსასუნასთან”, მადრიდელებმა ცუდად ითამაშეს. ვერც ზიდანის ცვლილებებმა მოიტანა შედეგი, თუმცა ფრანგი ყველაფერზე მეტად იმით იყო უკმაყოფილო, რომ ლა ლიგის შეფებმა მატჩი არ გადადეს. მისი აზრით, ავდარში თამაში საერთოდ არ უნდა გამართულიყო.

„თავი ვერაფერს გავართვით, მაგრამ ამ გაყინულ მოედანზე, რაც შევძელით ეს იყო. ამას ფეხბურთი არ ჰქვია. ასეთ მეტეოროლოგიურ პირობებში, ისიც კი არ ვიცით მადრიდში როდის დავბრუნდებით.

ვიმეორებ, ეს არ იყო ფეხბურთი. მატჩი უნდა გადაედოთ, თუმცა ამაზე ჩივილს ახლა აზრი აღარ აქვს. რაც მოხდა, მოხდა.

სათამაშო პირობები არ იყო. ვიცი, ერთსა და იმავეს ვიმეორებ, მაგრამ სიმართლე ეს არის და სხვას ვერაფერს ვიტყვი”.

მოგეხსენებათ, უამინდობის გამო მადრიდელებმა პამპლონაში ჩასასვლელადაც გვარიანად იწვალეს.