მისამართი შეიცვალა…

წუხელ, რეიკიავიკში გაირკვა, რომ ევროპის ჩემპიონატზე მოხვედრის შემთხვევაში საქართველოს ნაკრები C ჯგუფში ნიდერლანდებთან, უკრაინასთან და ავსტრიასთან ითამაშებს. ორი მატჩი ბუქარესტში გაიმართება, ერთიც ამსტერდამში, ნიდერნალდებთან.

და რა შუაშია რეიკიავიკი?

სწორედ ისლანდიაში დათმო თავის საფლეიოფო მატჩი რუმინეთის ნაკრებმა, რომლის შედეგზეც იყო დამოკიდებული C და F ჯგუფებში მეოთხე გუნდების ვინაობა.

რუმინეთი, ცხადია, წარმატების შემთხვევაში, ბუქარესტის 55-ათასიან „არენა ნაციონალზე“ ითამაშებდა, D ლიგის გამარჯვებული (საქართველო ან მაკედონია) კი გერმანია, საფრანგეთი, პორტუგალიის ქვეჯგუფში წავიდოდა და სამიდან ორ მატჩს მიუნხენის „ალიანს არენაზე“ ითამაშებდა.

რუმინეთმა ისლანდიაში 1:2 დათმო და ევროპის ჩემპიონატს იქვე დაემშვიდობა. ისლანდია კი უნგრეთში გაარკვევს კონტინენტის პირველობაზე გამსვლელისა და შესაბამისად, F ჯგუფის მეოთხე გუნდის ვინაობას.

მოკლედ, უკვე გადაწყვეტილია, რომ საქართველო ჩრდ. მაკედონიის დამარცხების შემთხვევაში 13 ივნისს ბუქარესტში, ავსტრიას შეხვდება; 17 – ში იქვე, უკრაინას დაუპირისპირდება; 21 ივნისს კი ამსტერდამში, „იოჰან კრუიფ არენაზე“ ნიდერლანდელებთან ითამაშებს..

ოღონდ იქამდე, ერთხელაც ვთქვათ, 12 ნოემბერს ჩვენებმა „დინამო არენაზე“ მაკედონიას უნდა აჯობონ.

ავტორის პროფილი

კობა ინასარიძე: კობა ინასარიძე–ანი ინასარიძის და ექსკლუზიური მასალების მამა. ხშირად შემჩნეულია ქართულ ფეხბურთში არსებული განუკითხაობისა და არაპროფესიონალიზმის წინააღმდეგ ბრძოლაში. დელიკატესებიდან უყვარს "სარბიელი", ლუდი და გერმანიის ნაკრები.