ზარალი – სარბიელი

თუ კორონავირუსის გამო შეწყვეტილი სეზონი არ განახლდება, ინგლისურმა ფეხბურთმა შეიძლება 10 მილიარდი გირვანქა დაკარგოს.

პრემიერლიგის შეფების მონაწილეობით მომდევნო თათბირი სამშაბათს არის დანიშნული. სავარაუდოდ ეს იქნება ონლაინ-შეკრება, სადაც შეეცდებიან მდგომარეობის გადარჩენის ახალი გზები დასახონ.

არადა, როგორ გინდა დასახო გზა, როდესაც ხელისუფლება მასობრივ თავყრილობებს კრძალავს. უფრო სავარაუდოა, რომ სეზონს, რომელსაც „ლივერპული” 25 ქულიანი უპირატესობით იგებდა, წერტილი დაესმება.

„დეილი სტარი” წერს, რომ სატელევიზიო უფლებათა, დარჩენილი ტურების, ევროპული და შიდა თასების წყალს გაყოლილმა შემოსავალმა შეიძლება 1 მილიონ გირვანქას გადააჭარბოს.

ამას გარდა, კორონავირუსის მიზეზით იაფდება საკუთრივ კლუბები. მაგალითად, საფონდო ბირჟაზე „მანჩესტერ იუნაიტედის” ფასმა 613 მილიონი გირვანქით დაიკლო.

ეს უპრეცედენტო 25 პროცენტიანი დანაკლისია და თუ გავითვალისწინებთ, რომ პრემიერლიგის სხვა კლუბებიც ასეთივე დღეში არიან, ზარალი 9 მილიარდს მიაღწევს.