ესპანური კალათბურთის ევერესტი

ვისაც არ უნდა მოეგო ფინალი, მსოფლიოს ორგზის ჩემპიონი გახდებოდა. არგენტინა თუ შორეულ 1950 მოპოვებული ოქროთი იწონებდა თავს, ესპანეთს აგერ, 2006 წელს ჰქონდა ნაგემი ტრიუმფი.

მარკ გაზოლი ძმასთან NBA-ს ჩემპიონობაში 1:2 კი აგებს, მაგრამ მსოფლიო ჩემპიონობაში აქეთ მოუგო 2:1.

სამი მეოთხედის შემდეგ ესპანეთი უკვე მსოფლიო ჩემპიონი იყო (23:14, 20:17, 23:16). არ ჰგავდა არგენტინა 19 ქულის 10 წუთში ამომღებ გუნდს.

კი გაიბრძოლეს (28:29), მაგრამ დასკვნითი მეოთხედიც, მატჩიც და ტრიუმფიც ესპანეთს ერგო.

არგენტინელი გაბრიელ დეკის 24-მა და ნიკოლას ლაპროვიტოლას 17-მა ქულამ ოკეანისგაღმელებს ვერაფერი არგო, ჩრდილში დარჩა მათი ლიდერი ლუის სკოლაც.

ფინალამდე მესამე ადგილისთვის მატჩი გაიმართა. ნირწამხდარმა საფრანგეთმა და ავსტრალიამ ბრინჯაოსთვის ბოლომდე იომეს. ფრანგებმა ტაიმი 9 ქულით დათმეს, თუმცა ჯამში დამსახურებულადაც მოიგეს 67:59 (11:16, 10:14, 21:16, 25:13).

ფრანგებს ისევ დე კოლომ (19) და ფურნიემ (16) ულიდერეს. ბრინჯაო კარგია, მაგრამ დე კოლოს დავესესხებით: „თუ ნახევარფინალს დავთმობთ, სამშობლოში თავდაღუნულები დავბრუნდებით“.

ავტორის პროფილი

გიორგი ნოზაძე: მას შეეძლო, დილის 11 საათისთვის გაზეთის ორი გვერდი მზად ჰქონოდა და გადაერეკა თანამშრომლებისთვის - ნუ შეწუხდებით, სამსახურში ნუღარ მოხვალთ, საქმე გაკეთებულია. ფეისბუკის ნამდვილი ფეისი. ის გახლავთ სოციალურ ქსელში "მოამბეც" და "ვრემიაც".