პრემიერლიგა ნიორწყალში

ფიქრობთ ვშაყირობთ? პარასკევს „ოლდ ტრაფორდის“ ახლოს ჩამვლელნი ნივრის მძაფრმა სუნმა შეაწუხა.

ცრუმორწმუნეებმა ისიც თქვეს, „ლივერპულთან“ პრინციპული მატჩის წინ მანკუნიანელები ავ სულებს დევნიან ან მეტოქეს ჯადოს უკეთებენო. ყველაფერი გაცილებით პროზაულადაა:

უკვე 5 წელია, „მანჩესტერის“ მთავარი აგრონომი ყოველი მატჩის წინ და შემდეგ მოედანს ნიორწყალის ხსნარით რწყავს. 1 ლიტრი კონცენტრირებული ნიორწყალი 24 ლიტრ წყალში იხსნება და გრუნტი მუშავდება. ნიორი სპობს ნემატოდებს – ჭიაყელისებრ მიკროსკოპულ მავნებლებს, რომელნიც ბალახის ფესვთა სისტემას აზიანებენ.

რეგულარული დანიორწყლების პირობებში ბალახი გაცილებით ჯანმრთელი და ხასხასაა. „მანჩესტერი“ უკვე 5 წელია ამ პრაქტიკას მისდევს, თუმცა, მარტო სულაც არაა – იგივე ხდება „სიტის“ და „კრისტალ პალასის“ საშინაო არენებზე.

2016 წელს „სიტი“-„გლადბახის“ მატჩის მერე ტრიბუნები ჯერ არ დაცლილიყო, რომ მოედნის დამუშავება დაიწყო – სამ დღეში „ბორნმუთთან“ მატჩი ელოდათ.

„კრისტალ პალასის“ აგრონომი საშინლად ვერ იტანს ნივრის სუნს და აირწინაღით მუშაობს – საყვარელი გუნდი მსხვერპლს მოითხოვს. ერთ მშვენიერ დღეს, ალბათ, ჩვენამდეც მოაღწევს ამგვარი მოწინავე ტექნოლოგიები და სტადიონების ირგვლივ ჩაწიკწიკებული სახაშეები მერე ნახეთ…

ავტორის პროფილი

გიორგი ნოზაძე: მას შეეძლო, დილის 11 საათისთვის გაზეთის ორი გვერდი მზად ჰქონოდა და გადაერეკა თანამშრომლებისთვის - ნუ შეწუხდებით, სამსახურში ნუღარ მოხვალთ, საქმე გაკეთებულია. ფეისბუკის ნამდვილი ფეისი. ის გახლავთ სოციალურ ქსელში "მოამბეც" და "ვრემიაც".