ტურინის „იუვენტუსს“ სეზონის დაწყებამდე თავდასხმის გასაძლიერებლად სულ უფრო ცოტა დრო რჩება. „ბარსელონადან“ ლუის სუარესის ტრანსფერი ჯერ ისევ თეორიაა და იტალიელები მადრიდის „ატლეტიკოს“ მიადგნენ. მათი სამიზნე ალვარო მორატაა, რომელიც „ბიანკონერის“ შემადგენლობაში 2014-2016 წლებში უკვე ბურთაობდა.
ესპანური კლუბი ფეხბურთელის სანაცვლოდ სულ მცირე 80 მილიონ ევროს ითხოვს. „იუვენტუსი“ კი სხვა ვარიანტს სთავაზობს: თქვენი თავდამსხმელის სანაცვლოდ ჩვენი სამი ნახევარმცველიდან ერთი წაიყვანეთო. გამეტებულთა სიაში ფედერიკო ბერნარდესკი, დუგლას კოსტა და აარონ რემზი არიან.
თუ „ატლეტიკოს“ ნახევარმცველი სჭირდება, ეგებ კიდეც დათანხმდეს, მაგრამ ვაჭრობის ამბავია – ფულის დამატებას ყველა ვარიანტში მოითხოვენ.
