ორი ახალი შემთხვევა

პრემიერლიგის შეფებსა და კლუბების ხელმძღვანელებს გული მიეცათ — covid 19-ზე ტესტირების მეორე ეტაპმა მხოლოდ ორი დაავადებული გამოავლინა.

სულ ჩაატარეს 996 ტესტი. გარდა ავადმყოფების რაოდენობისა, კარგი იყო ისიც, რომ ისინი სხვადასხვა კლუბიდან აღმოჩნდნენ.

ტესტირების პირველ ეტაპზე 748 შემოწმებულიდან ექვს ადამიანს აღმოაჩნდა კორონავირუსი. ისინი იყვნენ 3 სხვადასხვა კლუბის წარმომადგენლები. მათ შორის ფეხბურთელებიც ერია და კლუბის თანამშრომლებიც.

მეორე ჯერზე მეტი ტესტი გამოვიდა. მიზეზი: პირველში „ნორვიჩის” ანალიზები არ იყო შეტანილი, რომლის მასალაც გასულ სამშაბათს აიღეს.

ტესტირების მესამე ეტაპი ორშაბათს და სამშაბათს ჩატარდება. შემდეგ კი, ოთხშაბათს, ოცივე კლუბის წარმომადგენელი მონაწილეობას მიიღებს ვიდეოკონფერენციაში, სადაც გაარკვევენ გადავიდნენ თუ არა სრულფასოვან, კონტაქურ გუნდურ ვარჯიშებზე.

ხუთშაბათს კი გაიმართება მორიგი შეხვედრები, სადაც იმსჯელებენ შეჯიბრების განახლების თარიღზე, მასპინძლობის საკითხზე და ტელეტრანსლაციებზე.

თუმცა, ახალ ფაზაზე გადასვლამდე, სრულფასოვანი ვარჯიშების შესწავლა იქნება საჭირო. გამოსაკვლევია, გამოიწვევს თუ არა ის დაავადების შემთხვევების ზრდას.

„ლესტერის” ბოსი ბრენდენ როჯერსი, მაგალითად, ამბობს, რომ ივლისამდე თამაშების განახლება არაფრით არ შეიძლება.