საბაობა

„სარბიელთან“ ერთად 10-წლიანი პაუზის შემდეგ „სარბიელის“ გამოკითხვაც აღვდგინეთ. გამოკითხვა, რომელშიც მხოლოდ ქართულ ფეხბურთზე მომუშავე სპორტული ჟურნალისტები მონაწილეობენ და რომლის მიზანიც სეზონის საუკეთესო ქართველი ფეხბურთელის გამოვლენა გახლავთ.

წლეულს ამ საქმეში ჩვენი პარტნიორი „ლიდერბეთი“ გახლავთ, ლიდერი კომპანია  ინტერნეტსივრცეში.

ჟურნალისტები თავიანთ რჩეულს მაისში, ანუ სეზონის ბოლოს პირველი, მეორე, მესამეს პრინციპით ასახელებენ. ყოფილა და ამჯერადაც არის შემთხვევა, როცა კოლეგამ ნომინანტთა შორის ერთი ან ორი ფეხბურთელი დაასახელა. ქულების დარიცხვის სისტემა მარტივია – პირველ ნომრად დასახელებული კანდიდატს ენიჭება 3 ქულა, მეორეს – 2, მესამე – 1. ქულები ჯამდება, შედეგები კი საჯარო ხდება.

„სარბიელისა“ და „ლიდერბეთის“ წლევანდელ გამოკითხვაში ისტორიაში ყველაზე მეტი –  80 სპორტული ჟურნალისტი მონაწილეობდა. მათ დაასახელეს საქართველოს 2017-2018 წლების სეზონის საუკეთესო ქართველი ფეხბურთელი.

ხმების აბსოლუტური უმრავლესობით გაიმარჯვა საქართველოს ნაკრებისა და მოსკოვის „ლოკომოტივის“ მცველმა საბა კვირკველიამ, ვინც ჯამში 211 ხმა მოაგროვა. მას 80 დან 64-მა სპორტულმა ჟურნალისტმა მიანიჭა პირველი ადგილი.

მეორე ჰოლანდიური „ვიტესის“ კაპიტან გურამ კაშია გახლავთ, ვინც საქართველოს ნაკრებშიც ერთ-ერთი მთავარი ფიგურაა; ხოლო მესამე ადგილი მედიამ ბელგიური „გენტის“ შემტევს, 18 წლის გიორგი ჩაკვეტაძეს არგუნა.

თუ ამ სეზონში კლუბსა თუ ეროვნულ გუნდში საბა კვირკველიას თამაშს თვალს ადევნებდით, არჩევანის სისწორეში, ალბათ, ეჭვი არ შეგეპარებათ.

ის საქართველოს 2017-2018 წლების სეზონის საუკეთესო ქართველი ფეხბურთელია, რაც თავისთავად ძალიან ბევრს ნიშნავს და მით უმეტეს, მცველისთვის – მცველებს ხომ ამგვარ გამოკითხვებში იშვიათად წყალობენ.

ნომინანტთა შორის სულ 16 ფეხბურთელია, მათგან მხოლოდ სამი თამაშობს ეროვნულ ლიგაში – თბილისის დინამოელები ოთარ კიტეიშვილი და ხვიჩა კვარაცხელია, ასევე ქუთაისის „ტორპედოს“ მეკარე როინ კვასხვაძე.

ჯერ იხილეთ გამოკითხვის სრული ნუსხა.

და აქვე შეჯამებული შედეგები: