ბარსამ ბილბაოს გადაუარა და მადრიდს ელის

Pedri of FC Barcelona battles for possession with Ander Izagirre of Athletic Club during the Spanish Super Cup Semi-Final match between Barcelona and... „ბარსელონამ’’ ესპანეთის სუპერთასის ფინალისკენ გზა იოლად გაიკაფა, „ბილბაოს’’ 5:0 მოუგო. ეს საუდის არაბეთის ქალაქ ჯედაში, „მეფე აბდულას სპორტულ ქალაქში’’ მოხდა.

კატალონიელებმა ანგარიში 22-ე წუთზე გახსნეს, გოლი ფერან ტორესმა შეაგდო. მერე გოლი პირველის საგოლე პასის ავტორმა ფერმინ ლოპესმა 30-ზე შეაგდო. ოთხ წუთში ფერმინმა ისევ საგოლე პასი შეასრულა, შვედ რუნი ბარდგის გაატანინა, კიდევ ოთხ წუთში კი ბარდგიმ გაუწია ასისტენტობა რაფინიას. მეორე ტაიმის მეშვიდე წუთზე მაყურებელმა ისევ ბარდგის პასი და რაფინიას გოლი ნახა.

ბარდგი ქუვეითში დაბადებული ასირიელია მამის მხრიდან სომხური სისხლით, რომლის ოჯახიც ადრე სირიაში, კერძოდ ალეპოში ცხოვრობდა. ის შვედეთის ნაკრების ფეხბურთელია.

რაფინია ჩინებულ ფორმაშია. მატჩის შემდეგ მან „სპორტს’’ მისცა ინტერვიუ:

„ვფიქრობ მხოლოდ ჩვენზეა დამოკიდებული ესა თუ ის მატჩი იოლი იქნება თუ რთული. დღევანდელი თამაშის შედეგი ისეთია, ვინმემ შეიძლება იფიქროს, რომ იოლი გასეირნება გვქონდა, მაგრამ „ბილბაოს’’ დამარცხება მარტივი არასდროს არის. ჩვენ კარგ ფორმაში ვართ, მაგრამ საუკეთესო თამაშამდე ჯერ მაინც არ მივსულვართ.

შეხვედრა კიდევ იმით იყო საინტერესო, რომ გამოჩნდა ― მოედანზე როგორი სასტარტო შემადგენლობითაც არ უნდა გავიდეთ, ყოველთვის მზად ვართ. რუნი და ფერმინი ძალიან კარგად შემოგვიერთდნენ’’.

მედიის წინაშე წარსდგა 18 წლის მცველი პაუ კუბარსიც. მან თქვა: „ჩვენი გუნდის შემტევები ძალიან მობილიზებულები არიან. ისინი საუცხოოდ თამაშობენ, რაც ყველას გვეხმარება. უკვე რამდენი შეხვედრაა, რაც გოლს არ ვუშვებთ და ეს ძალიან მნიშვნელოვანია. სწორედ ასე უნდა განვაგრძოთ. როდესაც ტაბლოზე 5:0-ს კითხულობ ხვდები, მეტოქესთან რამდენად დიდი უპირატესობა გაქვს, მაგრამ პედლიდან ფეხის აღება არ შეიძლება. ეს უპირატესობა ფინალში დაგვეხმარება’’.

დღეს, ესპანეთის სუპერთასის მეორე ნახევარფინალურ მატჩში „რეალი’’ „ატლეტიკოს’’ ხვდება.