სიმეონე შემადგენლობას ცვლის

„ატლეტიკოს” და „პორტუს” პირველი თამაში 0:0 დამთავრდა

„ატლეტიკოს“ მწვრთნელი დიეგო სიმეონე „პორტუსთან“ ჩემპიონთა ლიგის ჯგუფური ეტაპის გადამწყვეტ შეხვედრაში შემადგენლობის გადახალისებას აპირებს.

მადრიდელებს ჯგუფში მეორე ადგილის დაკავებისა და ფლეი-ოფში მოხვედრისთვის რთული სატურნირო ლაბირინთის გავლა მოუწევთ. B ჯგუფიდან გასული „ლივერპულია“, დანარჩენები კი საკუთარი თავისა და იღბლის იმედად არიან.

დიეგო სიმეონეს გუნდმა აუცილებლად უნდა გაიმარჯვოს. თუ „პორტუ“ მოუგებს — ის გავა. მეორე თამაშის შედეგს მნიშვნელობა აღარ ექნება.

თუ „ატლეტიკო“ გაიმარჯვებს, „პორტუ“ კი გავარდება, მაგრამ მადრიდელების ბედი დამოკიდებული იქნება იმაზე, რას იზამს „მილანი“ შინ „ლივერპულთან“. მილანელებს მარტო მოგება კი არა, გატანილ-გაშვებულთა უკეთესი სხვაობაც სჭირდებათ.

რაც შეეხება სიმეონეს ცვლილებებს: ჩერნოგორიელი სტეფან სავიჩის მაგივრად მარიო ერმოსო ითამაშებს, თუმცა მთავარი ეს არ არის. მთავარი ცვლილება თავდასხმაშია მოსალოდნელი, სადაც ანტუან გრიზმანს მატეუს კუნიას ნაცვლად ლუის სუარესი და ტომა ლემარი დაეხმარებიან.