ვალენსიაში ულტრა მემარჯვენეები იმუქრებიან

რა ხდება ქართველი მეკარის გიორგი მამარდაშვილის კლუბის „ვალენსიას“ გარშემო? როგორც ესპანური წყაროები იტყობინებიან, ბოლო დღეებში გულშემატკივართა კლუბმა სახელწოდებით „ულტრა იომუს“ განაცხადა, რომ გააქტიურებას და ჩრდილოეთ ტრიბუნაზე გავლენის დაბრუნებას აპირებს. არადა, ამ კლუბს თავი დაშლილად ჰქონდა გამოცხადებული.

ამასთან დაკავშირებით, ქალაქ ვალენსიას მერმა ჯოან რიბომ კლუბის ხელმძღვანელებს სიმტკიცისკენ მოუწოდა და სთხოვა, რომ თუ „მესტალიაზე“ ულტრა-მემარჯვენე ძალების გააქტიურებას შეამჩნევენ, პოზიციები არ დათმონ.

„ჩვენ მოხარულები ვართ, რომ „ვალენსიას“ ფეხბურთის კლუბმა ეს საკითხი მოაგვარა. ვფიქრობთ, ასეც უნდა მომხდარიყო. სპორტი ძალადობისა და სიძულვილისგან თავისუფალი უნდა იყოს.

ახლა კლუბს ვთხოვთ, თუ შეამჩნევენ, რომ ხსენებული ბანდები ხელახლა იწყებენ მოქმედებას, განაგრძონ მტკიცე მოქმედება. სპორტი ფუნდამენტური სფეროა. ვალენსია სპორტული ქალაქია და გვიხარია, რომ ჩვენთან ძალადობა დათრგუნულია“.