ფრჩხილები თამაშგარეში

VAR ტექნოლოგიის შემოღების შემდეგ გარკვეული წინააღმდეგობრივი მომენტების ანალიზი გამარტივდა, მაგრამ თამაშგარე მდგომარეობის უდავოდ დადგენა მაინც რთულია. მოქმედი წესების წინააღმდეგ უკვე ღიად გაილაშქრა „ლივერპულის“ დამრიგებელმა იურგენ კლოპმა.

„მხარს ვუჭერ FIFA-ს და UEFA-ს იდეას თამაშგარე მდგომარეობის წესის გამარტივების შესახებ. მის დანერგვას დიდი დრო არ დასჭირდება. თორემ რა გამოდის: ნახევარი საათი სჭირდება იმის გარკვევას, დარჩა თუ არა ფეხბურთელს ფრჩხილები თამაშგარეში,” – განაცხადა 52 წლის გერმანელმა.

ცოტა ხნის წინ UEFA-ს პრეზიდენტმა ალექსანდერ ჩეფერინმა გამოთქვა მოსაზრება, თამაშგარეს „დერეფანი“ 20-30 სანტიმეტრით განისაზღვროსო.

FIFA-ში ფიქრობენ, რომ თამაშგარეს დაფიქსირებისთვის ფორვარდი არამხოლოდ მთელი სხეულით უნდა იყოს ბოლო მცველზე წინ – მათ შორის „ღიობი“ აშკარად უნდა ჩანდეს.

დაველოდოთ. ცვლილება არამხოლოდ წინააღმდეგობრივ საკითხებს მოაგვარებს, შედეგიანობაზეც აისახება და შესაბამისად, მატჩების სანახაობრივ მხარესაც მნიშვნელოვნად გაზრდის.

ავტორის პროფილი

გიორგი ნოზაძე: მას შეეძლო, დილის 11 საათისთვის გაზეთის ორი გვერდი მზად ჰქონოდა და გადაერეკა თანამშრომლებისთვის - ნუ შეწუხდებით, სამსახურში ნუღარ მოხვალთ, საქმე გაკეთებულია. ფეისბუკის ნამდვილი ფეისი. ის გახლავთ სოციალურ ქსელში "მოამბეც" და "ვრემიაც".