ხომ არ ჩაიშლება პსჟ-ს თამაში?

Khvicha Kvaratskhelia of PSG, left Geoffrey Kondogbia of Marseille during the Ligue 1 football match between Paris Saint-Germain and Olympique de... ხვალ დიდი მატჩია, „მარსელი’’ „პარი სენ ჟერმენს’’ მასპინძლობს, „პარიზიენში’’ კი უცნაური წერილი დაიწერა: ჩაიშლება ფრანგული კლასიკო? – კითხულობს ფრანგული გაზეთი. პირველი, რასაც მკითხველი იფიქრებს გუნდების გულშემატკივართა მტრობაა. მარსელელი ქომაგები დედაქალაქელთა გუნდისადმი ავი დამოკიდებულებით გამოირჩევიან, მაგრამ თურმე ამჯერად მიზეზი სულ სხვაა: ზღვისპირა ქალაქში ავდარია გამოცხადებული.

პროგნოზის თანახმად დღეს, შაბათს და ორშაბათს მარსელში მზიანი დარი იქნება, აი, კვირას კი დიდი ნალექია მოსალოდნელი. სწორედ იმ დროს, როდესაც „ველოდრომზე’’ მატჩია დანიშნული თქეშს ელიან და ვარაუდობენ, რომ მან თამაში შეიძლება ჩაშალოს… ანდა დააბრკოლოს მაინც.

ახალ სეზონში ფრანგული ფეხბურთის უბოროტესი მტრებისთვის ეს პირველი დაპირისპირებაა. ფავორიტად პსჟ მიაჩნიათ, რადგან ის ცხრილს ოთხი თამაშიდან ოთხი გამარჯვებით ლიდერობს და ბოლო შეხვედრაში, ჩემპიონთა ლიგაში „ატალანტას’’ ეფექტურად მოუგო 4:0. მეორე მხრივ „მარსელი’’ შინ თამაშობს და თავისი გულშემატკივრის წინაშე შერცხვენის უფლება არ აქვს. თან, ხმელთაშუაზღვისპირელებმა ჩემპიონთა ლიგაში თავიანთი პირველი შეხვედრა წააგეს ― 1:2, მადრიდში, „რეალთან’’.

მოახლოებული შეხვედრის შესახებ „ატალანტასთან’’ მატჩის საუკეთესო ფეხბურთელმა ხვიჩა კვარაცხელიამ ასე თქვა: „ყველა თამაში შემდეგი მატჩისთვის მზადებაა. ვიცით, რომ მომდევნო შეხვედრა „მარსელთან’’ გვაქვს, ამიტომ განსაკუთრებით ვემზადებით. კარგად ვიცით ისიც, თუ რას ნიშნავს ეს შეხვედრა ჩვენი გულშემატკივრისთვის. ძალ-ღონეს არ დავიშურებთ’’.