წამში ევრო რა, ღორი ვარ?!

გაცვეთილი ანეკდოტის პერიფრაზისთვის ბოდიშს გიხდით, მაგრამ რონალდუ -„რეალის“ ახალი გარიგების წაკითხვისთანავე ეს ასოციაცია გამიჩნდა. 31 წლის პორტუგალიელმა მადრიდული კლუბის შეფებს ხმა მიაწვდინა – წლიური 30 მილიონი ის თანხაა, სხვა კლუბისკენ გახედვის სურვილს ჩანასახშივე რომ ჩამიკლავსო. ავი ენები ამბობენ, ამბიციურ პორტუგალიელს პსჟ-ში ნეიმარის ხელფასი არ აძლევს მოსვენებასო (ბოლოსდაბოლოს, მსოფლიოში საუკეთესოდ ხომ სწორედ კრიშტიანუ აღიარეს). ნეიმარის ხელფასი მაინც ცოტა მეტი იქნება, მაგრამ ასაკობრივი კოეფიციენტის გათვალისწინებით, სამართლიანია. მოკლედ: რონალდუს ხელფასი ჯერ თვეებზე, მერე დღეებზე, საათებზე, წუთებზე და წამებზე რომ გავყოთ, წამში 0.96 ევრო გამოდის. ანეკდოტიც ამან გამახსენა: მენეჯერი ეუბნება რონალდუს, ბარემ წამში ევრო მოგეთხოვაო და იმან კიდევ: წამში ევრო რა, ღორი კი არ ვარო…

ავტორის პროფილი

გიორგი ნოზაძე: მას შეეძლო, დილის 11 საათისთვის გაზეთის ორი გვერდი მზად ჰქონოდა და გადაერეკა თანამშრომლებისთვის - ნუ შეწუხდებით, სამსახურში ნუღარ მოხვალთ, საქმე გაკეთებულია. ფეისბუკის ნამდვილი ფეისი. ის გახლავთ სოციალურ ქსელში "მოამბეც" და "ვრემიაც".