არგენტინელი, მაგრამ მესი არა…

დიდი შანსია, „პარი სენ ჟერმენის” ახალი თავკაცის, მაურისიო პოჩეტინოს პირველი შენაძენი მისი თანამემამულე, არგენტინელი ვარსკვლავი იყოს; ოღონდ, ამჯერად ლეო მესიზე არ არის ლაპარაკი. საქმე ეხება მესის მეგობარს, „მანჩესტერ სიტის” 32 წლის ფორვარდ სერხიო „კუნ” აგუეროს.

ეს ამბავი ფეხბურთელის ფრანგმა აგენტმა ბრუნო სატინიმ თქვა. ის ტელეკომპანია Canal + -ის ღამის საფეხბურთო შოუში იყო სტუმრად.

„მანჩესტერ სიტისთან” კონტრაქტის ვადა აგუეროს მიმდინარე სეზონის ბოლოს ეწურება. არგენტინელი პრემიერლიგის ისტორიაში ერთ-ერთი საუკეთესო ბომბარდირია, რომელსაც ბოლო თვეებში ტრავმები შემოეჩვია და პეპ გვარდიოლა სამარქაფოდღა იყენებს.

აგუეროს შეძენით პოჩეტინო მხოლოდ ჩინებულ თავდამსხმელს კი არ დაიმატებს, არამედ მესის მისატყუებლად ხელსაყრელ გარემოს მოაწყობს.

ამბობენ, რომ „მანჩესტერ სიტისგან” არგენტინელის შეძენით „იუვენტუსიც” არის დაინტერესებული.