ვალენსია კაპიტანს ეთხოვება

დანიელ პარეხო ჯერ მხოლოდ 31 წლისაა და „ვალენსიასთან“ მისი კონტრაქტი 2022 წლამდეა ძალაში. ამის მიუხედავად, კლუბმა ოფიციალურად განაცხადა, რომ ერთერთ საუკეთესო ნახევარმცველს ტრანსფერზე აყენებს. ექსპერტთა მოსაზრებით, ნახევარმცველის რეალური ფასი 27-28 მილიონი ევროა, მაგრამ კლუბი მას მაქსიმუმ 10 მილიონ ევროდ შეელევა. ამის მიზეზი ის გახლავთ, რომ პარეხომ ჩამოთვალა კონკრეტული კლუბები, რომლებში გადასვლაზეც თანახმა იქნება: „რეალი“, „ბარსელონა“, „ატლეტიკო“, „ვილიარეალი“ და „სევილია“.

მადრიდული კლუბი კიდევ გასაგებია. პარეხომ თავის დროზე „რეალის“ აკადემია გამოიარა, ფარმკლუბ „კასტილიას“ წევრი იყო და რამდენიმე შეხვედრა ძირითად გუნდშიც ჩაატარა.

რაც შეეხება დანარჩენ კლუბებს, ესპანეთში სხვებზე წელგამართულები არიან და პარეხოს მეორე მითხოვნის დაკმაყოფილება შეუძლიათ – მას დღევანდელი ხელფასის შენარჩუნება სურს. „ვალენსიას“ კაპიტანი წლიურად 3 მილიონ ევროს იღებდა. პრინციპში, ესეც გახდა მისი ტრანსფერზე დაყენების მიზეზი – ერთის მხრივ, კლუბი სატრანსფერო თანხას მიიღებს და მეორე მხრივ, სახელფასო უწყისში ორი ან სამი ახალგაზრდა ტალანტის სამყოფ რესურსს გამოითავისუფლებს.