ნაპოლის ძველი კაპიტანი აინტრახტს იგონებს

Stanislav Lobotka of Napoli during the UEFA Champions League group A match between Liverpool FC and SSC Napoli at Anfield on November 01, 2022 in... ჩემპიონთა ლიგის მერვედფინალის წილისყრამ ხვიჩა კვარაცხელიას „ნაპოლი” გერმანულ „აინტრახტს” დააპირისპირა. ეს გუნდები 28 წლის წინ უეფას თასზე შეხვედრილან. მაშინ ფრანკფურტის გუნდში ქართველი ფეხბურთელი კახა ცხადაძე თამაშობდა, თუმცა „აძურისთან” მატჩებში მონაწილეობა არ მიუღია (ნეაპოლში სათადარიგოთა სკამზე იჯდა), „ნაპოლის” კაპიტანი კი გახლდათ რობერტო ბორდინი, რომელმაც ძველი ამბები გაიხსენა.

„მე 1994 წელს „აინტრახტის” წინააღმდეგ ორივე შეხვედრაში ვითამაშე. მკლავზე „ნაპოლის” კაპიტნის სამკლავური მეკეთა. დღევანდელი დღესავით მახსოვს, როგორ გავუცვალე მოედნის ცენტრში ვიმპელები ტონი იებოას, ძალიან ძლიერ თავდამსხმელს. პირველ შეხვედრაში უიღბლობის გამო დავმარცხდით. რენატო ბუსომ საკუთარ კარში გაიტანა მატჩის ერთადერთი გოლი. საპასუხო თამაშში გადავსებულ და მღელვარე „სან პაოლოზე” ვცადეთ მდგომარეობის გამოსწორება, მაგრამ რა არის დასამალი, რომ ჩვენ ვეთამაშებოდით გუნდს რომელიც როგორც ფიზიკურად ასევე ტექნიკურად გაცილებით ძლიერი იყო. და მათი მწვრთნელი იყო იუპ ჰაინკესი”.

„აინტრახტმა” ნეაპოლშიც მოიგო 1:0. გოლი რალფ ფალკენმაიერმა გაიტანა.

შემდეგ კი ბორდინმა ახლანდელი მდგომარეობა მიმოიხილა და თქვა, რომ 2023 წლის 22 თებერვალსა და 16 მარტს სხვა ვითარება იქნება:

„მას მერე ბევრი წელიწადი გავიდა. დღეს ყველაფერი სხვანაირადაა. მიმდინარე სეზონში ნაპოლი სხვა გუნდია”.

და ბოლოს სტანისლავ ლობოტკას შესახებ: „ვფიქრობ, ლობოტკა ევროპაში ერთ-ერთი საუკეთესო ნახევარმცველია. ის უპრობლემოდ ართმევს თავს ორ ამოცანას — ყოველ შეხვედრაში კილომეტრებს ფარავს და შეტევას ამწვავებს. ის „ნაპოლისთვის” საკვანძო ფეხბურთელია”.