კორონავირუსის მსხვერპლი: ლორენსო სანსი

კორონავირუსმა ლორენსო სანსი იმსხვერპლა. მადრიდის „რეალის” 76 წლის ყოფილი პრეზიდენტი რამდენიმე დღის წინ გადაიყვანეს საავადმყოფოში, მაგრამ ექიმებმა ვერ უშველეს. ის 21 მარტს გარდაიცვალა.

სანსი „ლოს ბლანკოსს” 1996-2000 წლებში ედგა სათავეში. მანამდე ის „სანტიაგო ბერნაბეუზე” რამონ მენდოსას ადმინისტრაციაში დირექტორად მუშაობდა.

ლორენსო სანსმა „რეალის” დასუსტებულ გუნდს, რომელსაც Los Merengues (ბეზეს) ეძახდნენ, ახალი სიცოცხლე შთაბერა. მან თავიდან მწვრთნელად მიიყვანა ფაბიო კაპელო, რომელსაც გარს ისეთი ლეგიონერები შემოუკრიბა, როგორებიც იყვნენ რობერტო კარლოსი, კლარენს ზეედორფი, დავორ შუკერი, პრედრაგ მიატოვიჩი… ამ თაობის კულმინაცია 1997-98 წლების სეზონში ჩემპიონთა ლიგის მოგება გახლდათ.

მისი პრეზოდენტობის ხანაში „რეალმა” ჩემპიონთა ლიგაში ორჯერ გაიმარჯვა. იყო წარმატებები შინაურ სარბიელზეც. და მაინც, „თეთრების” სტრუქტურაში გაჩენილი ინსტიტუციური პრობლემების გამო სანსს 2000 წელს ვადამდელი არჩევნების დანიშვნა მოუხდა. ამ არჩევნებზე სულ რაღაც 3167 ხმით გაიმარჯვა ფლორენტინო პერესმა, რომელთანაც მას, როგორც „მარკა” წერს, შესანიშნავი ურთიერთობა ჰქონდა.

ყოფილმა პრეზიდენტმა 2004 წელს კვლავ სცადა თანამდებობაზე დაბრუნება, მაგრამ ვერ შეძლო — არჩევნებში დამარცხდა.