ქოჩორას ყვითელი ბარათი და საგოლე პასი

გიორგი ქოჩორაშვილის „სპორტინგმა’’ ჩემპიონთა ლიგის დებიუტანტ „ქაირათს’’ თავისი ადგილი მიუჩინა – 4:1. მეორე მხრივ აღსანიშნავია, რომ ყაზახეთის გუნდმა პორტუგალიურს ერთი საათის განმავლობაში შეძლებისდაგვარად გაუწია წინააღმდეგობა, 65-ე წუთამდე მხოლოდ 0:1-ს აგებდა. ქართველი გულშემატკივრისთვის მნიშვნელოვანია, რომ ქოჩორაშვილმა თავიდან ბოლომდე ითამაშა. მე-4 წუთზე მან ორთაბრძოლაში მეტოქეს ტერფზე ფეხი დააბიჯა, რისთვისაც ყვითელი ბარათით დასაჯეს. 44-ე წუთზე ქართველმა ნახევარმცველმა საგოლე პასი მიითვალა.

Flashscore-მა ქოჩორაშვილს 7.2 დაუწერა (სასტარტო შემადგენლობის ფეხბურთელთაგან მეშვიდე შეფასება), sofascore-მა 6.6 (მერვე), ხოლო whoscored-მა 6.5 (მეათე).

შეხვედრის ერთ-ერთი ყველაზე თვალსაჩინო მომენტი გახლდათ 21-ე წუთზე „ქაირათის’’ 21 წლის 18 წლის მეკარის შერხან ქალმურზას მიერ მორტენ ჰიულმანდის მიერ დარტყმული პენალტის მოგერიება. ყმაწვილი მეკარისთვის ეს საოცნებო სტარტი იყო ჩემპიონთა ლიგაში.

„სპორტინგის’’ მწვრთნელი რუი ბორჟესი: „ეს ჯერჯერობით მხოლოდ პირველი გამარჯვება გახლდათ, შეჯიბრების დასაწყისში სამი ქულა მოვიპოვეთ. მცირე მღელვარება გამოიწვია იმან, რომ გოლები თავიდანვე ვერ გავიტანეთ. მეორე ტაიმში მოწინააღმდეგეს საშუალება მივეცით საკუთარი თავისა ერწმუნა. ამის შემდეგ დაახლოებით 15 წუთი მართლა „სპორტინგივით’’ ვითამაშეთ’’.